AMED - Neva Unala ke bi serran sektorê kafe de sey karker xebitya, dima ra kargerîyê xo akerd û kafeyê xo de kede û serkewtişê cinîyan mojnena ra. Nevale dîyar kena ke na kafe de hîyerarşî çin a, heme çî komunal o û her kes xebityeno û va aye sey wayîrê kargerî vernê de cinîyan gêna kar.

 

Neval Unale ke 25 serrî sey karker sektorê kafeyan de xebityaya, nika kargerîyê xo akerda û bîya sey cinîyê serkewtişê yê kedkaran. Nevale qezaya Sûrê Amedî de konaxêke tarîxî de kafeyêke akerde û dîyar kena ke aye seba kar rêza ewil dana cinîyan.

 

Nevale eynî wextî de heskerdoxa heywanan a zî û hem keyeyê xo de hem zî kargerîyê xo de mîlçikan wey kena. Nevale kevokan zî wey kena û heme war açernaya halînê mîlçikan. Nevale wina vana: "Mi domanîya xo de heywanan ra hes kerdêne. Ez bê heywanan nêeşkena bicuyî. Bi taybet zî mîlçikî. Parçeyêke cuya min ê. Keye de mîlçikê Muhabetî kafe de zî kevokê mi estê."

 

'Sûr seba mi zaf girîng o'

 

Nevale da zanayîş ke Sûr seba aye wayîrê girîngîyêke pîl o û qiseykerdişê xo wina dewam kerde: "Seba ke ez Sûr ra zaf hes kena, mi waşt tîya kafe akerî. Ez tîya ameya dinya, ez tîya pîl bîya. Na qeza şahidîyê xeylê çîyan kerda. Şaristanan rê wayîrî kerda. Pêwa heme çî serê lingan de menda."

 

'Her kes têduşt o, her kes xebityeno'

 

Nevale tewr peyîn qiseykerdişê xo de arde ziwan ke mabêne aye û xebatkaran de tu hîyerarşî çin o û wina va: "Her karêke bi hawayêke komun dewam keno. Ez têkoşînê kede rê erje dana. No semed ra ez înan xo ra cîya nêvînena. Na kafe de hîyerarşî çin a. Heme çî  komun o. Her kes xebatkar o.”

 

Heto bîn ra Nevale bale ante krîzê ekonmî ser ke demo peyîn de rojeve de yo û da zanayîş ke krîzê ekonomî nê sektoran ardê sewîyeya çinbîyayîşî û heme çî çin kerdê.