ŞIRNEX - Prosesê qedexeyê tebervejîyayîşê kuçeyan de sera 70ê Şirnexi ame çinkerdiş û TOKÎyê ke şar nêwazenê bikoyê ci, karkeran zî mexdur kena. Karkeran dîyar kerd ke binê şert û mercê giran de cuyenê û seba ke pereyê xo nêgirewtê, çalakîya fek kar ra veradayîş bi ca ardê.

 

Şirnex de 14ê Adara 2016an de  qedexeyê tebervejîyayîşê kuçeyan ame îlankerdiş û 246 rojan dewam kerd, no prosesî de sera 70ê bajar ame rijnayîş.  Bi hezaran keyeyê ke zirarê giran vînabî ameyî rijnayîş û vera înan TOKÎ ameyî viraştiş la nîno zanayîş ke do kenga bêrê teslîmkerdiş. Karkerê ke TOKÎyan de xebityayî zî, hewteyê vîyarte seba pereyê înan nêameyo dayîş, hewteyêke fek kar ra vera dayî.

 

Teslîmat demêke nêzdî de yo!

 

Taxê Bahçelîevler, Dîcle, Cumhurîyet, Gazîpaşa, Îsmetpaşa, Yenî û Yeşîlyurtî ke 8 aşman qedexe dewam kerd, înşatê 6 hezar û 500 awanî û hezar dikanî dest pêkerd. Bi 3 serrî yo xebatî dewam kenê û awanîyê ke ame vatiş do Tebaxa 2017an de bêrê teslîmkerdiş beşêke kêm ame qedênayîş. Awanîyan ra tena 120 avanî ameyî teslîmkerdiş.

 

'Ma şima estan ra tersenê'

 

Ame zanayîş ke bi hezaran karkerê xebityenê zî bi aşmêke meaşê xo nêgînê. K.Y dîyar kerd ke ê pêwa şertê nêbaş de xebityenê zî rastê her tewir caardişê nêbaş yenê û va: "Bi aşman o, ma tîya xebityenê. Rojêke yenê vanê ‘lez bikerê ma keyeyan teslîm bikerê’.  Tîya zimistan zaf serd o. Çend serrî derbaz bi hema teqnayîş yenê cuyayîş. Her wext ma bi persê ‘gelo do este vejîyê' xebityenê. Ma her tewir zehmetî ancenê. La bi aşman o ma pereyê xo nêgînê."

 

K. da zanayîş ke hewteyo vîyarte de seba şertê nêbaş yê xebate û seba pereyê înan nêameyo dayîş hewteyêke çalakîya destveradayîşê kar kerdê û va: "Bi aşmêke yo pereyê hîn embazanê ma nîno dayîş. Fîrmayê taşeron yenê karkeran xebitnenê û dima ra pereyê înan nêdanê û şinê. Ma hewteyêke nêxebityenê la reyna bi eynî hawayî problemî dewam kenê."