WAN - Hemsereka Şaredarîya Payizava Yildiz Çetine ke vera aye qayûm ame tayînkerdiş arde ziwan ke aye bi îradeyê şarî ameya weçînayîş û va: "Şaredarî awanî ya. Ma nêvendenê şarê xo û nêvanê bêrê na awanî. Ma şinê keyeyê înan. Ma stand awan bikerê û verê şarî de bê."

 

Çarçeweya OHALî de bi Qerarê Hukmê Qanûnî (KHK) de qayûm tayînê 95 şaredarîyê Partîya Şaran ya Demokratîke (DBP) ame kerdiş. Bi tayînkerdişê qayûmî dir dima 35 kes cinî 110 hemşaredar ameyî tepiştiş.

 

3ê Sibata 2017an de qayûm tayînê şaredarîya Payizavayê Wanî bi û Yildiz Çetin û Zeki Yildiz ameyî tepiştiş û dima ra ameyî tehlîyekerdiş. 

 

'Do polîtîkayê xespî bi netîce nêbê'

 

Hemşaredar Yildiz Çetine prosesê dimayê qayûmî şîrove kerde û va ke do tu hêz nêeşko înan bido vindarnayîş û do polîtîkayê xespkerdişî bi netîce nêbê.

 

'Şaredarî kewta mîyanê deynan'  

 

Yildize da zanayîş ke nika mulkê aîdê şaredarîyan yenê rotiş û va: "Wexto ke qayûman şaredarî xesp kerdî o wext pereyê şaredarî mendib. La nika wexto ke ma ewnîyenê şaredarîyê ke qayûm ameyê tayînkerdiş binê deynan de mendê. Eynî wextî de dest danê serê projeyanê ma zî."

 

Hêrişê cinîyan kerdî'

 

Yildize da zanayîş ke înan binê nameyê temsîlkarîya têduştî de warê cinîyan awan kerdê la wexto ke qayûm ameyê tayînkerdişî ra dima hêriş serê nê waran de ameyê kerdiş.

 

'Nêverdayî ma projeyê xo bi ca bîyarê' 

 

Yildize va: "Projeyê ma yê derheqê domanan, astengdaran û cinîyan de bî la nêverdayî ma bi ca bîyarê. Şaredarî awanî yê. Ma nêvendenê şarê xo û ma nêvanê bêrê na awanî. Ma şinê keyeyê înan. Ma standan awan bikerê û verê şarê xo de bê."