Stêrvan Bêrîtan

 

MINBIC - Cinîya bi nameyê Meryem Dewjî ke debara xo bi keda destê xo kena va: "Wexto ke ez xebityena tewr zêde hêzdar bena. Seba cuyake baş xebat û keda destan lazim a."

 

Dinya de her ke şino krîzê ekonomî tewr zêde kûr beno û nê dir debare tewr zehmet bena. Cayê ke şer esto tewr zêde tesîr beno. Vera nê cinî seba debara xo bikerê xo ver danê. Minbic de zî seba debare bêra kerdene cinî hewl danê. Cinîya bi nameyê Meryem Dewjî (43) zî yew nê cinîyan ra ya ke seba debara xo bikera xo ver dana. Meryeme vana: "Ez maya 6 kêna û 2 lajan a. Seba ke ez emrê qij de ameya zewicnayîş, mi zaf zehmetî ant. No semed ra ez hemverê zewacê emrê qijî vejîyena. Mi zaf zulm dî, no semed ra ez nêwazena kesêke bîn no zulmî dir rî bi rî bimano. Dimayê ke mêrdeyê mi merd dima zî mi destê xo vera kesêke anêkerd. Ez xebityena ke debara xo bikera û destê xo vera kesêke anêkerî."

 

'Cinî çiqas bixebityê zî keda înan nîna vînayîş'

 

Meryeme bale ante serê keda cinîyan ke nîna vînayîş û wina va: "Cinî çiqas bixebityê zî keda înan nîna vînayîş. No zî nêheqîyêke pîl o. Ganî keda cinîyan nêra nimtiş. Her wext keda cinîyan bêra vînayîş. Wexto ke keda cinîyan bêra vînayîş do seba komelî zî baş ba. Eynî wextî de ganî cinî keda xo rê wayîr vejîyê û piştdayîş bidê yewbînan."

 

Bi keda destê xo debara xo kena

 

Meryeme da zanayîş ke aye xebate ra zaf hes kena û qiseykerdişê xo wina qedêna: "Ez bi şîşikan qazax, papîk, êleg, lûfik viraznena û roşena. Wexto ke ez nê çîyan viraznena, eynî wextî de ez ci ra çê kêf gêna. Xora eynî wextî de karêke hunerî yo zî. No semed ra tewr zêde kêfa mi yena. Ez wexto ke xebityena tewr zêde hêzdar bena. Seba cuyake baş xebate û keda destan lazim a."