RIHA - Dewaya muhakemekerdişê Serekwekîla Şaredarîya Pirsûsî Hulya Demîra ke hepisxane de ya, 7 serre û 6 aşmî cezaya hepisxane aye rê ame birnayîş.

 

Serekwekîla Şaredarîya DBPî yê Pirsûsî Hulya Demîra ke Kanûna 2016an de qezaya Pirsûsê Rihayî de amî tepiştiş û tewqîfkerdiş, bi îdîaya “Endamîya rêxistine” dewa derheqê aye de amebî akerdiş. Dewa de cezaya hepisxaneyî seba Hulya amî dayîş. Roniştişê Hulyaye Dadgeha Cezaya Giran ya 6in ê Riha de ame vînayîş. Dozgerîye bi îdîaya “Endamîya rêxistine” waşte Hulya bêra cezakerdiş. 

 

Avûkatê Hulyaye Sedat Gozkiran zî, pawitiş kerd û va: "Mûwekîla ey seba falîyetê siyasî û partîya sîyasî beşdarê şahî û çalakîyan bîya." Avûkat Sedat tewr peyîn pawitiş de beraeta mûwekîla xo waşt.

 

Dadgehe zî dimayê mabêneke kilm, bi îdîaya “Endamîya rêxistine” 7 serre û 6 aşmî cezaya hepisxaneyî Hulyaye rê birna.