STENBOL - Heme berardişî seba ke zêdebîyayîşê dolarî sera 50 vay bîyê û bi abîyayîşê mekteban dir zî keyeyî  kewtî zehmet. Keyeyî dîyar kenê ke ê nêeşkenê berardişê domananê xo yê mektebî êdî bigîrê.

 

Dimayê ke dolar berz bi, berardişê kirtasîye de zî sera 40-50 zam virazya. Vayîya defter, tewirê boyaxan, çente û qelemî tewr zêde bîyê. Verê ke zem bêro kerdiş kaxidê  A4 yê 40 rîpel 2 TL bi û nika 3 TL yo. Qelema 1 TL bî nika 1 û nîm a. Çente zî 30 TL ra vejîya 50 TL yo.

 

Weyîrê Kirtasiye Handan Koçe da zanayîş ke hacetê kirtasîye esasê ci 2 serre verê zem ameyo kerdiş û wina va: "Ewil her çî Asya ra ameyne zam ro ci ame kerdiş. Yanî tena Çîn, Japonya û Kore zî tede yê. Koma Penterl û markayê Pîlot zî berardişê Japonan ê. Kotayê gumrukî ame nê markayan. Zanayîşê ma çinbi. Serê sibayêke reyke sera 30 zam ame. Bi zêdebîyayîşê dolarî dir zam tewr zêde bi."

 

Handan tewr peyîn da zanayîş ke çîyo ke tewr zêde bîyo vay hacetê kaxidî yê û kaxidê fotokopîyê û goreyê serra vîyarte 4 kat zêde bîyê û va pakêtê kaxidê fotokopî bîyo 22 TL yo.

 

Ayşe Nalbante zî dîyar kerde seba ke berardiş zêdeyê nêeşkenê şîyayeyê domananê xo bikerê û wina va: "Ma nêeşkenê şîyayeyê domananê xo peyda bikerê. Domanê mi 7 serre yo şino sinife 1in. Çîyê mektebe mi waşt mi nêeşka bigîra. Hema çente, qelem û defterî mendê. Nika zî mektebe pere wazena. La ez nêeşkena bida. Mi 200 TL pere xerc kerd. Hema xeylê kêmasîyê mi zî mendê."

 

'Ganî çareserîyêke bibo'

 

Papatya Akkuyone zî ke domanê aye 13 û 6 serre estê nê vayîyan ra bi gazinc a û vana ke dimayê ke dolar zêde bîyo nêeşkena dayîş û girewtişê market û bazarî bikera û dimayê ke mektebe abîya zaf zehmetî ancena. Papatya da zanayîş ke domanêke xo rê 250 TL û domanêke xo yê bîn rê zî 250 TL xerc kerda la hema xeylê kêmasîyê înan estê û va ganî no hal çareser bibo.

 

Pakîze Bayare zî ke mêrdeyê aye nêxebityeno û aye zî karê rojane yê pakitî kena wina va: "Mi onlukê lajê xo girewt. Yê domana min a pîl e mi nêeşka bigîra. Çenteyê kêna mi veşa. Ez nêeşkena newe bigîra. Çenteyêke 70-80 TL yo. Rojane yê mi zî 30-40 TL yo. Ez aşme eşkena 4 rey bixebityî. Sewbînî kar çin o."

 

'3 domanî wanenê mi tena yew tena girewt'

 

Hatîce Erole ke maya 4 domanan a, arde ziwan ke 3 domanê aye şinê mektebe û va ê nêeşkenê şîyayeyî hemine bikera û domanêke tena 500 TL yo. Hatîceye da zanayîş ke cil û belg girewtê la hema hacetê kirtasîye nêgirewtê.