ŞEHBA - Fatimê Ebdilrahmana ke dewa Neşebiye ya bajarê Gotaye de cuyena arde ziwan ke leşkerê tirkî û komê OSOyî yê girêdayeyê aye vera keyeyê xo ra vejîyaya û seba cuyêk weşe verê xo daya herêma Efrînî, la hêrişê dewleta tirkî vera cuye înan rê bîya xerame.

 

Cinîya bi nameyê Fatimê Ebdilrahmana 21 serrî û dayîka yew domanêk dewa Neşebiye ya girêdayeyê bajarê Gotaye de cuyena. Fatimê Ebdilrahmane destpêkê pêrodayîşê Sûrîye ra nata her tewir dej û zehmetîyê şerî cuyena û dîyar kerde ke aye hertim tena kêfweşî gêraya, la her ca de raştê hêrişê dewleta tirkî û komê girêdayeyê aye Artêşa Azade ya Sûrîye (OSO) ameya.

 

Fatimêye destpêkê qiseykerdişê xo de dîyar kerde ke hêrişê dewa înan de mêrdeyê aye hetê komê çeteyan ra ameyo remnayîş û seba pawitişê domana xo Gota ra vejîyaya û wina dewam kerde: “Mi seba cuyêk kêfweş û weşî verê xo daye Efrîn. Ez 8 serran ewja de cuya ya. Cuya ewja baş derbaz bîyêne. La badê 8 serran dewleta tirkî û komê girêdayeyê aye bi heme teknîkanê xo aver hêrişê Efrînî kerdî.”

 

Fatimêye seba ke xo bipawa domana xo ya şenike reyde reyna koçber bîya û tewrê şarê Efrînî verê xo daya Kampa Xoverdayîşî ya Kantonê Şehba yî.

 

Fatimêya ke nika Kampa Xoverdayîşî ya Şehbaye de manena qala hêrişan kerde û va: “Ma şîyî kamî ca raştê hêrişê kovî yê dewleta tirkî û komê çeteyan ameyî. Cuya ma ya verê cû xeylê weşe bîye. La badê ke Erdogan hêrişê ma kerd, ma zehmetîyan cuyayî. Ma koçber bîyî û domana mi bê pî mende.”

 

'Derman nîno temînkerdiş’

 

Fatimêye wina dewam kerde: “Çimê Erdoganî bar nêbî kêfweşîya ma. Cok ra hêrişê ma kerd. Badê hêrişan xeylê sivîlî merdî û bi hezaran kesî zî koçê sewbîna cayan kerdî. Ez nika Kampa Xoverdayîşî ya Kantonê Şehbaye de manena. Lazimîyê ma pê yenî. La reyna zî kêmî yî. Di wayê mi nêweşî û derman nîno temînkerdiş.”

 

Çira domanan qetil keno?

 

Fatimêye qalîkerdişê xo yê peyênan de bale ante bêvengîya hêzê mîyanneteweyî yê vera hêrişê Erdoganî û Kampa Xoverdayîşî ya Şehbaye de kêmîbîyayîşê dermanan ser û wina va: “Ez hêrişanê Erdoganî şermizar kena. Erdogan vano ma heqê domanan pawenî, la çira domanan qetil keno? Ma do heyfê xo bigîrî. Erdogan wa herra m ara bivejîyo. Ma wazenê agêrî Efrînî.”