WAN - Hemşaredara Elbaqî Aynur Tarhana ke qayûm tayînê herinda aye amebî kerdiş dîyar kerde ke înan şaredarî bi fehmê teng û serdestîya camêrdan ra bedilnayî û cinî tewrê mekanîzmaya qerarî kerdî. Aynur Tarhane va: “Cok ra qayûm tayînê herinda ma kerdÎ. do şar weçînayîşê 2019î de reyna îradeya xo birona raşte.”

 

Hemşaredarê Elbaqî Aynur Tarhan û Îhsan Gulerî weçînayîşê 2014î de se ra 90ê rayan herînabî û amebî weçînayîş. La hetê îqtîdarî ra karê xo ra ameyî dûrîkerdiş û qeymeqam Abdulselam Ozturkî sey qayûm ardî herinda înan. Hemşaredar Aynur Tarhane derheqê xebatan de malumatan daye û daye zanayîş ke prosesê înan ra ver heme personelî camêrdan ra pê ameyêne û bi sîstemê hemserekî mîyanê siyasetî de cayê cinîyan virazîya.

 

Aynure destpêkê qiseykerdişê xo de va ‘verê cû şaredarî de cinîyî çin bî û kotaya înan zaf kêmî bî’ û wina dewam kerde: “Ma cinîyê zabite, karmend û pêroyê raşteyê karî de kar da cinîyan û meclîsê cinîyan awan kerd. Elbaqî de vejîyayîşê aver yê cinîyan moralêk gird awan kerde. Ma tewrê 25 cinîyê zerrîwaştoxan atolyeya neqş, fotograf, kuafor û hunerî akerd û xebatan meşna.”

 

‘Bazara keda cinîyan bîye Qursê Quranî’

 

Aynure dewamê qiseykerdişê xo de wina va: “Bi waştişê cinîyan ma bazara keda cinîyan akerde. Şar wayîrê bazare vejîya. Ma cinîyan ra pêşnîyazan herîna. Badê ke heme xebatê ma qedîyayî, polîtîkayê dagirker yê qayûmî xebatan dayî vindetiş. Bazara keda cinîyan bîye Qursê Quranî. Qurs û atolyeyê ma ameyî padayîş.”

 

Aynure daye zanayîş ke înan şar zî tewrê mekanîzmaya qerarî kerdî û planê stratejîk zî bi qerarê meclîsî xo pawenî şar. 

 

‘Ganî şaredarî seba xizmetê şarî bêra xebetnayîş’

 

Aynure qiseykerdişê xo yê peyênan de wina va: “Ma 5 serran wezîfeyê xo ard ca û hema zî wezîfeyê ma dewam keno. Şar hertim wayîrê şaredarîya xo vejîya û şar do îradeya xo weçînayîşê herêmî yê 2019î de reyna nîşan bida.”