Şehrîban Aslan

 

AMED - Derheqê teşîrkerdişê fotograf û îşkenceyê serê cenazeya Ekîn Wane de cigêrayîş amebi destpêkerdiş û dosya de yeno vatiş ke polîs û leşkerê ke serê cenaze de poz dayê nasnameyê înan ameyo tespîtkerdiş û telefonê 24 kesî de her çiqas fotograf esto zî hema kes nêameyo muhakemekerdiş, ya zî wezîfera nêameyê girewtiş.

 

10ê Tebaxa 2015an de Gimgimê Muşî de pêrodayîşo ke vejîyabi de Kevser Elturk (Ekîn Wan) ya YJA-STARije cuya xo vindî kerdebî û dima ra îşkence cenazeya aye rê amebi kerdiş. Cilê serê aye amebî vetiş, fotografê aye amebi eştiş û çapemenî de weşan kerdibî. Dimayê fotografan her cayê Kurdistanî de cinîyan çalakî viraşt. Kongreya Cinîyanê Azadan (KJA) ke bi KHK amî padayîş derheqê îşkencekerdiş û teşîrkerdişê cenaze de muracatê sucî kerdibî. Çarçeweya cigêrayîşî de ame dîyarkerdiş ke nasnameyê kesan ameyo tespîtkerdiş la kes nêameyo muhakemekerdiş.

 

Cigêrayîş dewam keno

 

Cigêrayîş serê di esasan de yeno meşnayîş. Ê yewin de Ekîn Wane bi saxî ameya tepiştiş, bi îşkence ameya înfazkerdiş û derheqê nê de cigêrayîş bêro meşnayîş. Ê diyîn zî îhtîmalêke ameya înfazkerdiş ya zî pêrodayîş de cuya xo vindî kerda, dima ra cilê serê cenaze ameyê vetiş û hetê leşkeran ra fotografê aye ameyê antiş û serê medyaya komelî de fotografî ameyî vilakerdiş.

 

Çarçewaya cigêrayîşî de yeno vatiş ke nasnameyê 24 kesê serê cenaze de poz dayê ameyê tespîtkerdiş û dest dayê serê telefonê înan û telefonê nê kesan de fotografê nê rengî ameyê vînayîş.

 

Avûkat Gulşen Ozere da zanayîş ke Tirkîya pêameyîşê ke hetkara ci ya bi ca nêana û va pêameyîş de hetê vernêgirewtişê îşkenceyan ferz keno. Gulşene da zanayîş ke heme çîyê ke cenazeya Ekîn Wane rê ameyê kerdiş îşkence îfade keno û hedîseya ke vejîyaya meydan wijdanê heme komelî birîndar kerda û vera nê reaksîyon ameyê mojnarayîş. Gulşene dîyar kerde ke hêzê asayîşî yê fotografan de ca girewtê, sûcê îşkence kerdê û arde ziwan ke tu kes dosya ra nêameyo muhakemekerdiş ya zî wezîfe ra nêameyo dûrvistiş.