STENBOL - Dayîkê Şemeyî Hanîfe Yildiz û Hanim Tosuna ke barîyerê Warê Galatasarayî amebi qedexekerdiş derbaz kerdî, qurnefîlê xo eştî pey barîyeran. Senîn Hanim û Hanîfeye qerenfîlî eştî polîsan bi endîşeyêke pîl qerenfîl war ra kom kerdî. Dayîkan no endîşeyê polîsan dî dîyar kerdî ke bi 23 serrî yo çimê înan qurnefîlan de yo.

 

Dayîkê Şemeyî bi waştişê ‘Wa vindî bêrê vînayîş, kiştoxî bêrê muhakemekerdiş' her hewte Warê Galatasarayî de yenê têhet û aqûbetê vindîbîyayeyan pers kenê. Hewteyê 700î çalakîya hetê wezaretê karê zereyîn ra ame qedexekerdiş û xeylê kesî ameybî tepiştiş. Hewteyê 704in de polîsan bi barîyerê Warê Galatasarayî dorpêç kerdî û Kuçeyê Îstîklalî de tedbîrê asayîşî girewtî. Polîsan her di hetê kuçeyî ke ÎHD de uca de yo padayî û destûr nêdayî dayikî verê ÎHD ra bimeşê. Dayîka Murat Yildizo ke amebi vindîkerdiş Hanîfe Yildize û cinîya Fehmî Tosunî, Hanim Tosune, parlamentera HDPyî Serpîl Kemalbay û parlamenterê CHPî Sezgîn Tanrikulu şî warê Galatasarayî û waştî qerenfîlan bidê ro.

 

Hanim Tosun û Hanîfe Yildize pêwa astengîyê polîsan qernefîlê xo serê barîyerê polîsan eştê Warê Galatasarayî. Hanim û Hanîfeye senîn qerenfîlî eştî, polîsan bi endîşeyîn qerenfîlan war ra kom kerdî.

 

'Bi 23 serrî yo çimê înan qerenfîlan bi'

 

Hanîfeye da zanayîş ke bi 23 serrî yo çimê înan qerenfîlan o û wina va: "Bi tepiştişê qerenfîlan hewl danê ke xo rehet bikerê. Mi înan ra va şima qerenfîlan tepişnenê. Mi înan ra va 'ma do qerenfîlan bidê uca'. Înan zî va ‘talîmato ke seba ma ameyo gerek ma ca bîyarê'. Ma zî va madem şima wezîfeyê xo anê ca, çira bi 23 serre yo nêard ca. Pêwa heme çî ma her hewte çalakîya bêveng viraşte. Çira wina beno? Sebebê talîmato ke ameyo dayîş o. Ma do qerenfîlanê xo berê uca. Qerenfîl vilêke yo. Tehemulê înan vera vilan zî çin o."

 

'Hema kom bikerê qerenfîlan'

 

Hanim Tosune zî da zanayîş ke serê astengîyê polîsan ra waştê çîyêke cîya bikerê û wina va: "Ma bi dayîka Hanîfe dir qerar dabi ma rast şêrê Galatasaray. Ma hewl da şêrê. La polîsan rayîr girewtib. Ma zî polîsan ra va rayîr akerê ma do qerenfîlan bidê verê heykelî, anêkerdî. Ma 15-20 deqe qisey kerd. Ma dî nêbeno. Ma zî hetêke ra ageyrayî û ma serê barîyeran qerenfîl eştî."

 

'Ma do no warî bigîrê'

 

Hanime arde ziwan ke warê Galatasarayî derbaz kerdê, qerenfîl eştê û war veng nêverdayê û wina dewam kerde: "Ma no war veng nêverda. Înan hêz,  bariyer, panzer û TOMA yê xo uca de bi ca kerdî. Reyna zî vernîya ma de nêeşkayî bibê asteng. Do uca ra tepya zî asteng nêbê. Heta ma no war înan ra bigîrê ma do xover bidê. Ê îşkence zî bikerê ma do fek vera nêdê."