Habîbe Eren

 

ENQERE -Yeno plankerdiş ke Etlîk û Bîlekentî de Nêweşxaneyê bajar bêrî akerdiş û çarçeweya projeyî de xeylê nêweşxaneyê şarî do Enqere de bêrî padayîş. Hemsereka Pêroyî ya SESî Gonul Erdene projeyê Nexweşxaneyê Bajarî sey ‘ortaxîya dewlet û sermayegozaran’ bi name kerde û va: “Ewro senî ke îqtîdaro siyasî hetê îdarekerdişî de krîz cuyeno, rasteyê weşî de zî krîz cuyeno.”

 

Bîlkentê Enqere de kapasîteya ci 3 hezar û 804 nivîne û Etlîkî de zî kapasîteya ci 3 hezar û 566 nivînî, di nêweşxaneyê girdî do bêrî viraştiş. Netîceyê viraştişê nêweşxaneyan de do 12 ra zêde nêweşxaneyê şarî bêrî padayîş.Hemsereka Pêroyî ya Sendîkaya Kedkaranê Xizmetê Sosyal û Weşîye (SES) Gonul Erdene derheqê projeyê nêweşxaneyê bajarî de qisey kerde.

 

‘Nê nêweşxaneyî bi ortaxîya dewlete û sermayegozaran yenî viraştiş’

 

Gonule qiseykerdişê xo de dîyar kerde ke nêweşxaneyê bajarî bi ortaxîya dewlete û sermayegozaran yenî viraştiş û wina va: “Çimeyê şarî pêşkeşê sermayegozaran kenî. Edene, Mersîn, Yozgat, Isparta û Qeyserî de zî nêweşxaneyê bajar yenî viraştiş. Xeylê projeyê nêweşxaneyê bajarî yê sewbîna zî estî. Yeno plankerdiş ke Bîlkent û Etlîkê Enqere de neweşxaneyê bajarî bêrî viraştiş. Bîlkent do 2018î de bêro akerdiş. Yeno vatiş ke do Eskîşehîr, Manîsa û Xerpêtî de zî neweşxaneyê bajar bêrî viraştiş. Tayyîp Erdogan projeyê neweşxaneyê bajar sey ‘xeyalê xo’ ardbî ziwan.”

 

‘Nê nêweşxaneyan de şifa mumkun nîyo’

 

Gonule dewamê qiseykerdişê xo de daye zanayîş ke 5 nêweşxaneyê ke heta nika abîyî de xeylê problemî ameyî cuyayîş û wina domnaye: “Mumkun nîyo ke nê nêweşxaneyan de şîfa bêro herînayîş. No het de omidê ma çin o. Eksê ci do nêweşî zêde bibî. Nê nêweşxaneyî teberê bajarî de yenî viraştiş û welatî problemê cidî cuyenî. Heme nêweşxaneyê mîyanê bajarî padanî û teberê bajarî de kampusan de şar arê kenî. randevuyan de zî problem yeno cuyayîş. Xebatkarê weşî şert û mercê giranan de xebetîyenî. Her nêweşêk rê 5 deqa wextê dermankerdişî keweno. Nê projeyê nêweşxaneyê bajarî de ontaxîya dewlete û sermayegozaran vejîya raşte. Ma wazenê heme kesî seyyewbînan heqê weşî ra feyde bigîrî û iwanê dayîke de xizmet bêro dayîş.”

 

Akerdişê nêweşxaneyê bajarî yê Bîlkent û Etlîkî reyde nêweşxaneyê ke bêrî padayîş wina yî:

 

*Neweşxaneyê Cigêrayîş û Perwerdeyî yê Numune,

* Neweşxaneyê Cigêrayîş û Perwerdeyî Dişkapi,

* Neweşxaneyê Îhtîsasî yê Berzî yê Tirkîya,

* Neweşxaneyê Cigêrayîş û Perwerdeyî yê Onkoloji yê Anqara,

* Neweşxaneyê Cigêrayîş û Perwerdeyî yê Neweşî û Weşîya Cıniyan Dr. Zekaî Tahîr Burak,

* Neweşxaneyê Cigêrayîş û Perwerdeyî yê Neweşî û Weşîya  Domanan û Welîdnayîşê Cinîyan Dr. Samî Ulus,

* Neweşxaneyê Cigêrayîş û Perwerdeyî yê Ataturk,

* Neweşxaneyê Cigêrayîş û Perwerdeyî yê Etlîk yê Zubeyde Hanim,

*Neweşxaneyê Gazî Mustafa Kemal, 

* Neweşxaneyê Dewlete yê Ulus,

* Neweşxaneyê Cigêrayîş û Perwerdeyî yê Rehabîlîstasyon û Dermankerdişê Fîzîkî yê Anqara,

* Neweşxaneyê Cigêrayîş û Perwerdeyî yê Çiman yê Ulucanlar,

* Neweşxaneyê Cigêrayîş û Perwerdeyî yê Domanan yê Dişkapi.