ŞIRNEX - Halîme Yaşa ke nêwaşt keyeyê xo yê Cizîrî ke xesar vînayo û kewto qado bi rîsk, açeryo TOKÎ, dîyar kerde ke seba nê 4 waştişname daya û her çar waştişname zî sey 440 TL cezaya pereyî ro înan açeryayo.  Halîmeye da zanayîş ke se beno wa bibo do keyeyê xo nêda rijnayîş.

 

Cizîrî de wextê qedexeyê tebervejîyayîşê kuçeyan yê 3 serre verê ke amebi îlankerdiş de xeylê keyeyê ke texrîb bîbî ameyî rijnayîş. Dimayê qedexeyî seba 9 taxan qerarê ‘qadê bi rîsk’ amebi dayîş û vera keyeyê ke ameyî rijnayîş zî awanîyê TOKÎyan ameyî viraştiş û hema nêameyê teslîmkerdiş. Keyeyê ke nêwaştî keyeyê înan kewtê qadî bi rîsk xera bibê zî hema têkoşînê xo danê.

 

Yew ê hemwelatîyan ra Halîme Yaşa û va seba keyeyê aye nêro rijnayîş 4 rey waştişname daya la 440 TL cezaya  pere dayê înan.

 

'Çîyêke mi xilas nêbi'

 

Halîmeye arde ziwan ke keyeyê xo yê taxa Cudî de heta qedexeyê peyîn mendê la dimayê qedexeyê peyîn mecbur mend vejîyê û wina va: "Seba bomba û guleyan ma mecbur mendî vejîyê. Dimayê ke ma tîya ra vejîyayî her kes cayêke rê vila bi. Dimayê ke qedexe qedyayî ma ageyrayî keye la çîyêk nêmendib. Hacetê ma heme, heta berî ameybî diznayîş. Ma ameyî keye newe ra viraşt. Hema nîşaneyê bombeyan keyeyê mi de esto. Nika rayîr zî verê berî de çin o. La cayê verê ke cîranê mi estbî nika TOKÎ estê. Ma bi hemkarîya avûkatan bi desan rey waştişname eşrawit wezaret. Înan zî va ‘şima dewlete sûcdar vînenê?’ û cezaya pereyî dayî ma. Se beno wa bibo ma do keyeyê xo nêdê rijnayîş. Seba nê çi hewce bikero ez do bikera."