STENBOL - Cinîyê Flormarî ke bi mehneyê sendîkayij ê kar ra ameyî eştiş û seba ageyrê karê xo bi 130 rojî yo verê fabrîka de xo ver danê û xeylê înan yewin rey broşuran vila kenê û beşdarê çalakîya girseyî benê. Cinîyan derheqê destkewtişê xoverdayîşî ke dayo înan de qisey kerdî û vatî ê tewr zêde xo ra bawer bîyê.

 

95 ci ra cinî bi pêroyî de 132 karkerê Flormarî xebityenê, bi mehneyê sendîkayîjê kar ra ameyî vetiş û seba ageyrê karê xo bi 130 rojî yo têkoşîn kenê. Yagmur Ozgorena ke serrêke û nîm flormar de xebitya û va: "Ma heqê xo nêgirewtî. Embazê min ê 6 serrî yo tîya xebityayê estê. Heqê ma nêdanê ma. Wexto ke ma nêameyne kar zabitname girewtêne. Raporê ma bibayne zî zabitname girewtêne. Ma zî qerar da ma bibê sendîqayij. Verê 15ê Gulane 15 embazê ma ameyî vetiş. Embazê ma dima ra ameyî verê berî ma zî piştdayîş da înan. Seba ke ma çepik dayî piro û ma dest înan rê berz kerd ma 60 kesî kar ra eştî."

 

'Meaşê camêrdan tewr zêde yo'

 

Yagmure dewam de arde ziwan ke senîn kewtê mîyanê xoverdayîşî, reklamê flormarî ameyo wedartiş û wina va: "Cinî çi biwazê eşkenê bikerê. Ma vanê ‘cinî biwaza eşkena biba sendîkayîj e’. Demê zehmetan de her wext ewil cinîyan tebera verdenê. Maeşê camêrda tewr zêde bi. Sey ke ma veng yenê tîya ewnîyenê ma ra."

 

 'Ma tewr zêde nêzdîyê yewbînan bî'

 

Yagmure tewr peyîn qiseykerdişê xo de arde ziwan ke sazgehê cinîyan piştdayîş dayo înan û vengdayîşê boykotê ma bi piştdayîşê rêxistinê cinîyan vila bîyo û wina va: "Ez yewin rey beşdarê çalakîyêke bena. Ma broşur vila kerdêne. Hîsê embazî tewr zêde bi û ma cinîyan dir tewr zêde nêzdî bî."

 

Cinîya bi nameyê Zuhal Aktaşa 3 serrî û nîm o flormarî de xebityena zî arde ziwan ke mêrdeyê aye merdo û di domananê xo rê ewnîyena û va: "Wexto ke ez xebityayne mi di rey qezaya kar derbaz kerde. Ez verê pî û maya xo de cuyena. Domanê mi şinê mektebe. Patronan fabrîka dayo îdarekaran û tenezul nêkenê ke bêrê bivînê. Patronî her wext camêrdan sey ke debara keyeyî kenê vînenê. Cinî yenê pelçiqnayîş. Pere tay danê cinîyan. Ez hewl dana ke domananê xo rê biewnî. Ez yewin rey beşdarê xoverdayîşî bena. Ez rewşa normal de merdimêke bêveng a. La xêrê nê xoverdayîşî bixobawerîya mi zêde bîya."

 

Heto bîn ra Zuhale veng da ke ganî kes berardişê flormarî nêgîro.