Bêrîtan Canozer

 

AMED - Merdimê hepsîyan vera îşkence û îhlalkerdişê heqan veng dayî û vatî: "Hepsî zere de xo ver danê, ma keyeyê înan zî ganî tewr zêde xo rêxistin bikerê û vera nê hêrişan têkoşîn girs kenê."

 

Goreyê dayeyê Wezaretê Dade ya serra 2017an hepisxaneyan de 224 hezar û 878 hepsî estê. Yeno zanayîş ke înan ra 9 hezar û 733 cinî yê, hezar domanî zî bi mayanê xo dir hepisxaneyan de manenê. Koxuşê 12 kesî de 30 kes manenê û koxuşê 20 kesî de zî 55 kes manenê. Mîyanê hepsîyan de bi seyan hepsîyê nêweş û û kal û pîr zî estê.

 

Xarpêt, Tarsus û Wan de îhlalkerdiş sewîyeya tewr berz da

 

Hepsîyê ke wazenê heqê xo xebitnê, her wext  rastê şîdetê cenderme û gardiyanan yenê. Erzenê serê koxuşan û rojname, defter û qelemê înan yenê desteserkerdiş. Bi taybet hepisxaneyê Xerpêt, Tarsus û Wanî de îhlalkerdiş resayo sewîyeya tewr berz.

 

Înfazê hepsîyan hîrê cezayê înan yê hucre bibo yeno veşnayîş

 

Hepisxaneyê Xerpêtî de odeyê hepsîyan de kamera ameyê bicakerdiş. Hepsîyê ke vera nê vejîyenê rastê cezayê hucre yenê. Hepsî nînê veradayîş û heqê înan dermankerdiş zî yeno îhlalkerdiş. Hepsîyê ke hîrê cezayê hucre girewtibê înfazê înan yeno veşnayîş. Seba cezayê xeberdarî zî, hepsî rastê qedexeyê pêvînayîşê telefon, mektube û pêvînayîşê akerde yenê. Hepsîyê ke bi kelepçe dermankerdiş qebûl nêkenê zî heqê dermankerdişî ra feyde nêgînê.

 

'Ganî keyeyî tewr zêde xo rêxistin bikerê' 

 

Bahar Yildize ard ziwan ke sey keyeyê hepsîyan ganî her kes destê xo bikero binê kerra û wina va: "Hepsî zere de xo ver danê. Wexto ke ma şîne pêvînayîş ma bi çimanê xo vînenê. Ma tedayê serê înan de vînenê. Dermanê nêweşan nîno dayîş. Ya zî bi aşman dima danê. Ma keyeyî ganî vengê xo tewr berz bikerê. Ganî keyeyî xo rêxistin bikerê."

 

Melek Başkale zî nê çî va: "Hepsî vera şertê giran xo ver danê. Ez Riha ra şî Stenbol pêvînayîşê birayê xo. Bi seyan keyeyî sey mi estê. Ma hema nêkewtê salona pêvînayîşî rastê tedayan yenê. Bi saetan ma danê vindernayîş. Çîyêke qij de ma  rastê hêriş û tacîzê vatişî yenê. Ma ra vanê merdimê terorîstan. Pêvînayîşê hepsîyan verê saetêke bi. La nika kerdê 35,40 deqe. Hema zaf tedayê bîn estê. La se kenê wa bikerê ma do sereyê xo nêtewênê. Ma tebera û hepsî zî do zere de tedayan veng vejê."