Dîlan Babat

 

ENQERE - Goreyê hûmara fermî nîya nêzdîyê 750 domanî bi mayanê xo dir hepisxane de yê. Avûkat Salîha Şahîne va: "Hepisxane seba merdimê pîlan cayê zehmet ê.  Bi taybet demê peyîn de problemê pîl yenê cuyayîş û hepisxane tesîr serê weşîya rih û bedenê domanan keno. Nê domanî goreyê embazanê xo ra wexto ke dest bi cuyayîşê teberî kenê 1-0 dima dest pêkenê."

 

Goreyê dayeyê Komeleyê Heqê Merdiman (ÎHD) 128 domanê yew serre, 114 domanê di serre, 81 domanê hîrê serre, 40 domanê 4 serre, 31 domanê 5 serre, 6 domanê  6 serre û 17 domanê ke emrê înan nîno zanayîş bi mayanê xo dir hepisxane de manenê. Endama Komîsyonê Hepisxaneyê ÎHDî yê Enqereyî avûkat Salîha Şahîne dîyar kerde ke goreyê dayeyê fermî nîyê 750 domanî bi mayanê xo dir hepisxane de manenê û rewşa nê domanan şîrove kerde.

 

'Domanî rewşêke zehmet de cuyenê'

 

Salîhaye dîyar kerde ke demê peyînan de xeylê kes ameyê tepiştiş û nê dir hûmara domanê ke hepisxane de yê zêde bîyê û na rewşe zî tesîrê serê faliyetê cuya domanan kena û wina va: "Na rewşe seba pîlbîyayîşê domanan zaf bi problemîn o. Hepisxane seba pîlan zehmet o. Seba weşîya rih û bedenê domanan tewr zêde tesîrêke negatîf keno. Domanê ke bi maya xo dir hepisxane de manenê goreyê domanê bînan 1-0 dest bi cuyayîş kenê."

 

'Seba feydeyê domanan mayî bêrê veradayîş'

 

Salîha dewam de wina va: "Hema cezaya kesan nêameya tesdîqkerdiş, bi mantiqê cezakerdişî têgeyrenê. Seba feydeyê domanan ganî mayî bêrê tahlîyekerdiş. Heto bîn ra eynî keye ra maye û pî hepisxane de estê û no semed ra domanê ke teber de mendê zî estê. Rewşa domanê ke hem zere û hem teber de yê zaf zehmet o û no zî îhlalkerdişî cidî mojneno ra. Seba ke hepisxane pak nîyê tesîrêke pîl serê cuya domanan beno. Hepisxaneyan de warê kaykerdişê domanan çin o."

 

'Bi mayan dir domanî yenê cezakerdiş'

 

Salîhaye tewr peyîn wina va: "Şertê hepisxane de domanî pîl benê. Qet nêbo ganî mayê înan bi 'veradayîşê bi kontrol’ bêrê veradayîş. Domanê nêweş estê. Ganî hepisxane de nêmanê. Cezayê mayê ke tesdîq bîyê bibê zî , wezaretê dade eşkena înfaz bikera.  La wexto ke ma vînenê domanî zî bi mayan dir yenê cezakerdiş."