ENQERE - Arîna ke bi maya xo Esma Yilmaze dir hepisxaneyê Tîpê T yê Hûmara 2 yê Riha de manena, rewşa aye her ke şina xira bena. Pîyê aye dîyar kerd ke Arîne zaf kîlo vindî kerda û binê çimê aye mor bîyê û eynî wextî de va hîrê domanê ey bînî zî psîkolojîyê înan xira bîyê.

 

Arîn Yilmaza 15 aşmî ke bi maya xo Esma Yilmaze dir hepisxaneyê Tîpê T yê Hûmara 2yîn Riha de manena, şert û mercê weşîya aye nêameyî  sererastkerdiş. Mihdî Yilmazî her rojê panşeme şino cinî û kêna xo vîneno, derheqê rewşa kêna xo Arîne de qisey kerd û va roj bi roje kîlo vindî kena. Mîhdî da zanayîş ke pêvînayîşê peyîn de musaw ke dermanê ke dayê Arîne rayîr ver bi helnayîşê este akerdo. Mîhdî da zanayîş ke binê çimê kêna ey mor bîyê û seba şit ra ameya akerdiş û şert û mercê hepisxane ra her ke şina kîlo vindî kena.

 

'Roj bi roje kîlo vindî kenê'

 

Mîhdî wina va: "Cinîya mi koxuşêke 30 kes tede manenê de manena. No zî seba domane problemêke yo. Vizîrî mi Esma dir bi telefon qisey kerd. Esma va koxuşêke newe ameya akerdiş û tena cinîyê ke domanê înan estê do tede bimanê. Psîkolojîyê cinîya mi her ke şina xira bena. Verê çimanê aye de domana her ke şina weşîya aye xira bena. Seba şert û mercan nêeşkena Arîne rê biewno. Koxuşe newe de 13 mayî û domanê înan estê. Heto bîn ra tebera zî hîrê domanê mi estê. psîkolojîyê înan baş nîyo. Keyeyê mi vila bi. Lajê mi pîl verê dedcinî xo de yo. Kêna mi verê pîrêke xo de ya. Ez û kêna xo ya qij e verê maya xo de yê. Ma heme cayê cîya de yê. Ez hewl dana ke psîkolojîyê înan baş bibo. Keyeyê mi vila bi. Wa ganî vernîya na rewşe bêra girewtiş."