ŞIRNEX - Bi nêzdîbîyayîşê aşma zimistanî dir bêrîvanê ke her siba seba antişê pesê xo konê rayîr, şinê zozanan û dimayê pes ancenê reyna ageyrenê dewe.

 

Her serre  bi aşmê wisarî dir Bêrîvanê Botanî vejênê zozanan û 6 aşmê xo uca derbaz kenê pes ancenê û reyna konê rayîr. Cinîyê dewa Roboskî yê kontarê Bestayî qezaya Qilabanê Şirnexî de cuyenê, seba antişê pesê xo bi aşman şinê û yenê. Bêrîvanê ke seranserê roje bi pesê xo dir manenê, wisarê bîn de zî do newe ra şêrê zozanan.

 

Cinîyê her siba rew bi traktoran şinê ko, roje ra di rey pes ancenê. Bêrîvanê ke her roje bi seyan pes amcenê mabêne werd û çay de yenê têhet û ver bi şan de zî şitê xo gênê û yenê dewe. Şit germ kenê û kenê penîr û mast.

 

'Ma nê aşman de cayê nêzdîyê dewe tercîh kenê'

 

Naîme Encu dîyar kena ke dewe de heywanê her kesî estê û wina va: "Bi aşmêke yo ma şinê û yenê. Ma zafê xo bi meşnayîş yenê la rayîrê heme kerra yê. Ma bi traktor yenê. Ma serê siba rew yenê û pes ancenê. Ma di rey ancenê. Xêrcê nê ma werdê xo tîya wenê. Ma aşma payîze de cayê nêzdîyê dewe tercîh kenê. Ma wisar reyna şinê zozanan.”

 

'Şitê ma seranserê serre qîm keno'

 

Hacîra Encu zî da zanayîş ke bi şitê pesî debara xo kenê û seba doman û merdimê xo yê teber ra zî eşrawenê û wina va: "Her roj qasê ma ra şit yeno. Ma bîdonan pirr kenê. Ma şan de şitê xo girnenê. Ma penîr, mast viraznenê. Wexto ke zêde bimano bazar de ma roşenê."

 

'No adet do her wext dewam bikero'

 

Ayşe Encu zî arde ziwan ke ê karê xo ra kêfweş ê û wina va: "Ma no adetî mayanê xo ra musayî. Ma do zî bimusnê domananê xo. Ma tena keyeyê xo de konê ra. Ma cinîyan dir yenê têhet û karê xo kenê. Ma rincan benê la ma şukur kenê. Domanê ma xêrê nê pesî dir pîl benê. Ma zî xêrê înan debara xo kenê."