WAN - Wan de şaredarîyê ke qayûm ci ameyo tayînkerdiş, wextê xebatê restorasyonî yê serê berardişê tarîxî keno, seba asayîş nêgîno, rayîr vera merdiman abeno û mîrasê kulturî yê bi hezaran serrî zî binê nameyê restorekerdişî de têkiliyê înan bi vîyarte de yeno birnayîş.

 

Berardişê tarîxî seba bêrê newekerdiş şert û mercê ewro binê nameyê restorasyonî de newe ra yenê înşakerdiş. Hacetê roja ewro yenê xebitnayîş û bi restorekerdiş yenê kerdiş zî têkilîyê berardişê tarîxî bi vîyarte ra yenê birnayîş. Nê xebatê binê nameyê restorasyonî de yenê kerdiş zî bi destê qayûman tayînê şaredarîyê Kurdistanî ra yenê kerdiş.

 

Wano ke şaristanîy sey Urartu, Pers, Îlhanî û xeylê bîn cuyayê, xeylê berardişê tarîxî bi çinbîyayîşî dir ameyî rî yewbînan. Yew înan ra zî Sûka Penîr yê tarîxî ya. Seba Sûke koordînasyonê Serekîya Daîreyê Başkerdişê Bajar û Îdareyê Rîskî Erdlerzî mîlyon TL butçe ame werdatiş û qayûm dest bi restorekerdişî kerdib. 12ê Temmuze de saete 16 de dêsê sûke rijyabî û rijnayîş de domano bi nameyê Harun Cengîzo 11 serre cuya xo vinî kerd û 4 kesî birîndar bî.

 

Dimayê ke dês rijya hemwelatîyan reaksîyon mojnayî ra û dîyar kerdî ke prosesê restorekerdişî de pêwa heme hişyariyan şaredarî tu tedbîrê asayîş nêgirewtib. Dimayê hedîse zanayîşê ke şaredarî dabi de amebi vatiş ke polîs û dozgerî cigêrayîş dayê destpêkerdiş.

 

Pirda tarîxî amî asfaltkerdiş

 

Yew xebatê restorasyonî ke ame kerdiş zî Pirda Şeytan a Bêgiriyî ya. Pirde serê çemê Bend-dî Mahî ameya awankerdiş. Dergîya aye 15 metre û hîrayîya aye zî 3 metreya. Berzî zî 17-18 metreya.  Bi kerrayê andezît ameya viraştiş. Yena vatiş ke seserra 19in de ameya viraştiş la nîna zanayîş ke kamî viraşta. Yeno vatiş ke beno ke Îlhaniyan na pirde viraşta.

Hetê şaredarî ra serê pirde rê asfalt ameyo rijnayîş. Serê reaksîyonê ameyê mojnarayîş de asfalt ame wedartiş û merciyê têkildarî derheqê babete de çîyêk nêvatî.