AMED - Pêwa bajarê betonî cinîyê Amedî amadekarîyê xo yê zimistanî bê mabên dewam kenê û serê adir de balîcanê xo peyşnenê û seba zimistanî wedarnenê.

 

Cinîyê ke heta nika bi cuya komunal ameyê nê rojan, amadekarîyê zimistanî kenê. Werdê ‘babaqenûç’ ke werdêke mintiqa ya Amedî ya, amadekarîyê zimistanî de rêze ewil de ca gêna. Cinîyê ke bazar de balîcanan gênê û Kuçeyê Gazîler de yenê têhet, serê adirê kolîyan de balîcanan viraznenê.

 

'Ganî balîcanê sîya bêrê tercîhkerdiş'

 

Cina bi nameyê Havva Alîcane dîyar kerde ke werdê ‘babaqenûç’ seba înan werdêke girîng a û wina va: “Ma sebzeyê ke zimistanî nînê vînayîş, nika gênê. Gerek balîcanê baş bêrê girewtiş. Reng û formê înan tehmê înan mojneno ra. Ganî sîya û pîl bi."

 

Cinîya bi nameyê Zehra Kiliçe zî da zanayîş ke bi balîcanê ser adir werdê cîya yenê viraştiş û wina va: "Balîcanê serê adir zaf baş ê. Borek û lehmecun zî yenê viraştiş. Bi mast û sîr zî zaf weş ê."

 

'Sîte benê asteng'

 

Elîf Agahatune zî va balîcanê ke firinê taxe yenê peyşnayîş tehmêke weş nêdanê û wina va: "Seba ma sîte de nişnenê ro, kes nêverdeno ma adir bifînê ta. Bajar açernayê beton, kulturê kuçeyî çin o. No semed ra asayîşê sîte nêverdeno ke ma uca viraznenê, ma zî şinê kuçe de viraznê."