ŞIRNEX - Sîlopîya de dimayê qedexeyê tebervejîyayîşê kuçeyan ra dima, keyeyê ke ameyî rijnayîş hîrê mintiqayê cîya de awanî ameyî viraştiş û awanîyê di mintiqayan teslîmê keyeyan ame kerdiş. Keyeyan va ke hema serrêke keyan nêqedîyayo, keye yenê war û hema tapoyê înan nêameyê dayîş.

 

Sîlopîya yê Şirnexî de hîrê serê verê qedexeyê tebervejîyayîşê kuçeyan ame îlankerdiş û dimayê qedexeyan taxê ke ameyî rijnayîş, awanîyê TOKÎ û keyeyê bi tîpê vîla ameyî viraştiş. Keyeyê TOKÎ û keyeyê bi tîpê vîla yê taxa Başak teslîmê keyeyan ame kerdiş û înşaatê keyeyan serê rayîrê Gorumlu zî ame vindernayîş.

 

Keyeyê ke ameyne vatiş do 2017an de bêrê  teslîmkerdiş, nînê zanayîş ke do key bêrê dayîş.

 

Tapo meydan de çin o!

 

Awanîyê taxa Başak de ameyî viraştiş aşma  Kanûna vîyarte de beşêke teslîmê keyeyan ame kerdiş. Awanîyê di qat û 4 daîre yê, bi vayîya zêde ersan dayî keyeyan. Keyeyê ke bi 10 aşmî yo keyan de yê, dîyar kerdî ke hema tapoyê înan nêameyê dayîş.

 

Keyeyan da zanayîş ke ê nê keyeyê tengan de nêeşkenê bicuyê û vera nêdayîşê tapoyan zî bi reaksîyon ê.

 

Keye hema zî hetê wezaret û şaredarî ra sey warê înşaatî yenê vînayîş. Seba nê zî hema xeylê keyeyî nêeşkenê îkametgahê xo bigîrê uca. Keyeyê ke şî şaredarî û hûmara keyeyê xo dayî û kaxit girewtî, eşkenê şêrê mudirîyê nufuse û îkametgah bigîrê.

 

Serrêke derbaz nêbi her ca xira beno

 

Pêwa ke serrêke derbaz bîyo zî keyeyê keyeyan sey înşaat yenê vînayîş û nêeşkenê aboneyîyê awe û ceyranê xo zî bigîrê. Verê nê keyeyê ke serrêke hemwelatî tede yê, her cayê înan yeno war. Dêsan de teriknayîş esto û boyaxê înan yeno war. Kerrayê dorê paceyan zî konê. Verê înan de borîyê mutbax û banyo teqenê.