ÎZMÎR - Dêrsim de şewatê daristanan dewam keno û heta nika daristan û xeylê gandarê ke mîyanê daristanî de cuyenî, zirar dîyî. Hêzê dewlete mudaxaleyê şewatî nêkenî û destûr nêdanî kesê zerrîwaştoxî zî şewatan hewna bikerî. Cok ra şewatî her ke şono hîra benî. Netîceyê şewatan de teyr û tûr mirenî. 

 

Endama Komîsyonê Ekolojî ya Partîya Demokratîke ya Şaran (HDP) Prof. Dr. Beyza Ustune derheqê şewatê Dêrsimî ke dewam keno de qisey kerde û dîyar kerde ke no şewat parçeyê polîtîkayê şerî yî. Beyzaye qiseykerdişê xo de daye zanayîş ke dewlete seba ke vernîya sermayegozaran akera, nê şewatan vejena.

 

'Mudaxale nêame kerdişe'

 

Beyzaye destpêkê qiseykerdişê xo de wina va: “Daristanê Kurdistanî 1990î ra nata yenî veşênayîş. Temmuza 2015î de Cudî de şewatê daristanan ame vetiş û no bî destpêkê şer. HDP çarçeweya babete de pêşnîyazêk da meclîs. Hewldayîşê hewnakerdişê şewatan ame astengkerdiş. Şewatan de wazenê herême bêmerdim bikerî û vernîya sermayegozaran akerî. Heme kesî pawitişê Dêrsimî ra berpirsîyar î. Ganî heme kesî vernîya qetlîyamê tebîî bigîrî.”

 

'Astengîya tewr pîlî polîtîkayê nijadperestî û globalî ya'

 

Beyzaye qiseykerdişê xo yê peyênan de wina va: “Vernîya têkoşînê ortax de astengîya tewr pîlî polîtîkayê nijadperestî û globalî ya. Wexto ke şar û darî bêrî qetilkerdiş, ez azade nîya. Kurdistan de merdimî bêrî qetilkerdiş, ma azadenîyî. Wexto ke heme kesî têhet de bicuyî, problemî çareser benî.