ENQERE - Sereka EMEPî Selma Gurkane dîyar kerde ke hukmat rewşa krîzo ke kewto mîyanê ci nimneno û se vajo wa vajo, pîyase, mitbax û sûke de şewat esto. Selmaye qiseykerdişê xo de daye zanayîş ke heta ke têkoşîn nêro dayîşe do rewşa ekonomî çareser nêba.

 

Seke yeno zanayîş Tirkîya de krîzê ekonomî yeno cuyayîş û her ke şono heme çîyan de vaye virazîyena. Vera dolar û euro de lîreyê tirkî timî keweno û kûrebîyayîşê krîzê ekonomî reyde feqîrî zî zêde bîyo. Krîzê ekonomî ra tewr zêde hemwelatî û esnafê şenik tesîr benî. Gaxê tebîî, cereyan û derzîne ra bitêr heta la heme çîyan de vaye birazîya ya. Sereka Partîya Kede (EMEP) Selma Gurkane derheqê krîzê eknonomî de malumatê muhîman dayî û dîyar kerde ke faturaya krîzî karker û kedkaran rê yena birnayîşe.

 

'Krîz do vila bibo heme rasteyan'

 

Selmaye qiseykerdişê xo de bale nate krîzê ekonomî yê Tirkîya ser û wina va: “No krîzî ra bi hawayo asan xelisnayîş, mumkun nîyo.  Krîzê ekonomî problemê sîstemê kapîtalîzmî yo. Polîtîkayê îqtîdarî benî sebebê krîzî.  AKP û Tayyîp Erdogan çiqas vajî krîz kayê hêzê teberî yo zî berpirsîyar ê bi xo yî. Berpirsîyarê rewşa nika îqtîdarê AKPyî yo. Krîz do vila bibo heme rasteyê cuye. AKP do şertê krîzî bikero firsend û rayirê karî bigêro. Heme prosesê krîzî de fatura krîzî karker û kedkaran rê yena birnayîşe.”

 

'Do krîzî ra zêde tesîr bibî'

 

Selma dewamê qiseyekerdişê xo de qala mehneyê îqtîdarî kerde û va: “Hukmat mehneyan erzeno raste. La mitbax, piyasa û sûke de krîz esto. Heta ke têkoşîn nêro dayîşe do rewşa ekonomî çareser nêba. Esnafê şenik do krîzî ra zêde tesîr bibî. Hetê weşî, perwerdeyî, xebatê şar û teqawitî do pêropîya krîzî ra para xo bigîrî û maaşê teqqwitan do kêmî bibo.”