AMED - Merdimê vindîbîyayeyan seba hewteya 500î çalakîya roniştişî de veng dayî û vatî: "Heta merdimê ma nêrê vînayîş ma do nê warî de bê. Pêwa qedexeyan ma do têkoşîn dewam bikerê."

Walîyê Amedî roja şemeyê vîyarte de bi sebebê ‘asayîşê îstîmlakî' çalakîya merdim vindîbîyayeyan qedexe kerd û çalakîya merdimê vindîbîyayeyan no hewte kewt 500. Keyeyê vindîbîyayeyan her hewte sloganê ‘wa vindî bêrê vînayîş, kiştoxî bêrê hukmkerdiş' çalakîya roniştişî kerdî, hewteyê vîyarte de zî Parkê Koşuyolu ra ameyî vetiş. Merdimê vindîbîyayeyan nika zî seba hewteyê   500î xo amade kenê û seba piştdayîşî veng danê heme kesê hîsgêran.

 

'2011an heta 2018 çi vurya'

 

Waya Fehmî Tosuno ke 30ê teşrîna verêne 1995an de tepiştiş de ame vindîkerdiş, Kiymet Zengîne da zanayîş ke qedexekerdişê çalakîya înan bêwijdanî yo û va: "Stenbol de Meydanê Galatasarayî de çalakîya 700yin ê Dayikê Şemeyî rastê hêrîşan ame. 2011an de Ofîsê Xebate ya Serekî yê Dolmabahçeyî bi serekwezîrê o wextî Recep Tayyîp Erdogan dir pêvanîyîş ame kerdiş. 2011an heta 2018an gelo çi vurya ke çalakîyê roniştişî nika yenê qedexekerdiş?”

 

'Do têkoşînê ma yo heqdar dewam bikero'

 

Kiymete bale ante serê qedexeyê hewteyê 499î û wina va: “Ma seba çalakî şî warê Abîdeyê Heqê Cuyayîşî. La ma çi dî? Amed de heme teşkîlatê polîsan war de kom bîbî. Ma înan ra çîyêk nêwazenê. Ma aqûbetê vindîbîyayeyanê xo wazenê. Ma do têkoşînê xo yê heqdar heta peyîn dewam bikerê."

 

'Ma do heta peyîn têkoşîn bikerê'

 

Îffet Muhîttaş zî da zanayîş ke birayêke aye tepiştiş de ameyo vindîkerdiş û yew zî binê nameyê kiştişê kerdoxê nêdîyar de ameyo qetilkerdiş û va çalakî de aqûbetê birayê xo Alî Tekdag û Mehmet Tekdag geyrenê. Îffete wina va: “Dewlete çalakîya roniştişî ro ma ferz kena. Ma seba vindîbîyayeyanê xo muracatê heme çî kerd. Ma seke dewlete çîyêk nêkerd. Eke hewce bikero ez do reyna ber bi ber bigeyrî seba birayanê xo. Heta peynîya cuya xo ez do aqûbetê biranê xo pers bikerî. Ma do fek cigêrayîşê xo yê heqdar vera nêdê."