Rûken Goman 

 

GIRKÊLEGÊ - Avûkat Xedîca Ibrahîme qala tecrîdo girankerde ke Rayberê Şarê Kurdî Abdullah Ocalanî ser o yeno domnayene, kerde û va: “Tirkîya de polîtîkayê huşk û zehmetin yenî meşnayene. Nê polîtîkayî tesîrêk zêde rewşa Ocalanî ser de virazenî. Tecrîdo girankerde pelçiqnayîşê heqê merdimîye yo”

 

Tecrîdo girankerde ke Rayberê Şarê Kurdî Abdullah Ocalanî ser o yeno domnayene, dewam keno. 27ê temuza 2011î ra nata avûkat, 5ê nîsana 2015î ra nata zî Heyetê Îmrali û teşebusê derbeya 15ê temuza 2016î ra nata zî keyeyê Ocalanî nêşênî şêrî pêvînayîşê Ocalanî. Heme muracatê pêvînayîşî bi mehneyanê ‘Keştîye xirabe ya, rewşa hewayî baş nîya û OHAL’ yenî red kerdene. Babete ser o Avûkat Xedîca Ibrahîme qisey kerde.

 

Avûkat Xedîca Ibrahîme qiseykerdişê xo qala tecrîdo girankerde ke Rayberê PKKyî Abdullah Ocalanî ser o yeno domnayene, kerde û wina va: “Bi tecrîdo girankerde ke Ocalanî ser o yeno domnayene, qanûnê mîyannetewyî yenî îxlalkerdiş. Heqê asayî û weşîya Rayber Ocalanî çiqas yenî dayîş, ma nêzanê. Seba ke tecrîdo girankerde esto, ma ti xebere nêşênî bigîrî. Zerrîya heme merdiman de şik esto. Dinya de fînakê tecrîdêk winasî çin o.”

 

'Tecrîdo girankerde teberê huqûqî yo'

 

Xedîca dewamê qiseykerdişê xo de va ‘goreyê qanûnê mîyanneteweyî no tecrîdo girankerde ke Rayberê PKKyî Abdullah Ocalanî ser o yeno domnayene, beno sebebê îxlal û pelçiqnayîşê heqê merdiman û wina dewam kerde: “Goreyê pêkerdişê mîyanneteweyî no tecrîdo girankerde teberê huqûqî yo. La reyna zî hêzê mîyanneteweyî û rêxistinê heqê merdiman yê mîyanneteweyî bêveng manenî. No nîşan dano ke menfîetê mîyanneteweyî esas yenî herînayîş. Polîtîkayê tecrîdî pêroyê dinya de benî sebebê kaosê gird. Ganî tecrîd bêro wedarnayîş.”

 

'Ganî tecrîd bêro wedarnayîş'

 

Xedîca qiseykerdişê xo yê peyênan de daye zanayîş ke ê seba Abdullah Ocalanî serra 2016î de komêk avûkatan ke 35 kesan ra pê yena awan kerdî û va: “Na kome xeylê projeyan daye vernîya xo û hema zî seba azadîya Ocalanî têkoşîn danî. Ma xeylê reyan kampanyaya îmzeeştişî viraşte. Ma komeleyê heqê merdiman yê mîyanneteweyî reyde zî têkilî rona. Do çalakîyê ma tewir bi tewir dewam bikerî. Tirkîya de polîtîkayê huşk û zehmetin yenî meşnayene. Nê polîtîkayî tesîrêk zêde rewşa Ocalanî ser de virazenî. Tecrîdo girankerde pelçiqnayîşê heqê merdimîye yo. Seba aştîya daîmî, ganî tecrîdo girankerde bêro wedarnayîş.”