COLEMÊRG - Şewat bi daristanê mabêne dewanê Keha Hemzo û Harê yê Colemêrgî kewt. Bi sebebê “Mintiqayê Asayîşê Taybet" destûr nîno dayîş ke kes derbazê mintiqa bibo.

 

Wareyê Xwarê Maqorkê, Navdeşt û Rêhla Hirça yê mabêne dewanê Keha Hemzo û Harê yê Colemêrgî de, şewat bi daristanan kewt. Bi sebebê “Mintiqaya Asayîşê Taybet” destûr nîno dayîş ke kes mûdaxaleyê şewatî bikero û her ke şino şewat vila beno.

 

Hemwelatîyêke nêwaşt nameyê xo bido, dîyar kerd ke şewat mintiqa de vila beno û va: "Dewlete destûr nêdana ma şêrê mintiqaya şewatî û mûdaxeleyê şewatî bikerê. La ê bi xo şewat nêtefnenê. Tîya de heme dar û bi seyan ganeyî bi şewatî dir çin benê. Ganî mudaxaleyê nê şewatî bêro kerdiş. Eke şewat nêro tefnayîş, do mintiqa de xeylê cayan rê vila bibo."