STENBOL - Cinîyê Hepisxaneyê Tîpê T yê Xarpêtî dîyar kerdî ke pêwa talîmatê wezaretê dade kamera koxuşan de ameyê bicakerdiş nêameyê wedartiş û seba nê embazan hedîse şermezar kerdê û no ser rastê cezaya hucre ameyî. Hepsîyan va îhlalkerdiş dewam bikerê do dest bi çalakîya bêîtiatîyê sîvîl bikerê.

 

Hepisxaneyê Tîpê T yê Xarpêtî 22 hepsîyê cinî bi hemkarîya avûkatanê xo mektubêke eşrawitî û îhlalkerdişê heqan qalî kerdî. Cinîyan mektube de vatî seba nêverdayê kamerayê koxuşî de dîmen bigîrê, rastê cezaya hucre ameyê û pêwa talîmatê wezaretê dade yê wedartişê kamerayan, kamera hema zî cayê xo de yê.

 

'Cuya taybet yena îhlalkerdiş'

 

Mektuba ke hetê cinîyan ra ameya eşrawitiş, wina yena vatiş: "Ma 06.08. 2018an de Hepisxaneyê Tîpê T yê Xarpêtî ra ardî Tîpa R. sey şima zanê seba hepsîyê nêweş Tîpê R ameyê dîzaynkerdiş û koxuşe ma de 6 kamera û xeylê pacayê taqîbkerdişî estê. No zî azadî û heqan asteng keno û vera cuya taybet a. No semed ra di embazê ma bi selahîyetdaranê sazgehî dir pêvînayîş kerdî û vatî ganî kamera wirzê. Ma reyna mektube eşrawit mercîyê têkildaran rê. Ma cewabêke nêgirewt. No ser ma zî serê kamerayan girewt. No prosesî de wezaretê dade qerar daya ke kamera wedarnê. No semed ra ma zî serê kamerayan girewt. Semedo ke ma serê kamerayan zî girewt, cezaya hucre dayî embazanê ma."

 

Ferzkerdişê leşkeran ê nîzamî

 

Dewamê mektube de ame vatiş ke pêwa ke rojê revîrî hewteyêke rojêk bêro kerdiş, la 20 rojan reyke yeno kerdiş û doktor her nêweşî ra vano ‘psîkolojîk o, stres ra yo' û înan eşraweno koxuşe. Heto bîn ra ame vatiş ke sewqkerdişê nêweşxaneyam de zî leşkerî tekmîlê nîzamî ferz kenê.

 

'Tecrîd sîstematîk yeno meşnayîş'

 

Mektube de tewr peyîn wina ame vatiş: "Maddeyê hepisxane yê 10 serran verê 2004an de ame wedartiş OHALî dir reyna ameyî. Dimayê OHALî hepisxaneyê bi tena sereyê xo bî sîstemêke cezakerdişî û hepsîyê sîyasî rastê caardişê giran yenê. Heqê cuyayîşî yenê îhlalkerdiş. Mudirê hepisxaneyê temsîlkarê ma bi hawayêke kêfî qebûl nêkenê. Pêvînayîş û dîyalogê ma yenê astengkerdiş. Heqê ma nîno dayîş, ma do dest bi çalakîyê bêîtiatîyê sivîl bikerê.”