Rûken Goman

 

GIRKÊLEGÊ - Avûkatê cinî yê ke beşdarî 3in Kongreya Yewîya Avûkatê Mintiqaya Cizîrî bî ardî ziwan ke seba çareserkerdişê problemê cinî û komelî gerek cinî warê huqûqî de wayîrê vatiş û heqê taybet bê.

 

Avûkatê cinî yê ke beşdarê 3in Kongreya Yewîya Avûkatanê Mintiqaya Cizîrî bî dîyar kerdî ke pawitişê qanûnê komelî û heqê cinîyan bingehê komelêke azad û xoser awan keno û vatî: "Seba herkes komelî de bibê wayîrê heqê xo gerek huqûqê ke heqê merdiman paweno bêro kerdiş."

 

Avûkat Emîna Ala wina va: "Verê Şorişê Rojawanî huqûq û qanûnê ke tena berjewendîyê kesan pawitine estbi. Cinî heqê xo ra bêpar ameyne verdayîş. La nika cinî bîyê wayîrê heq û mîyanê qanûnî de heqê aye yeno pawitiş. Wexto ke nika ma Rojhelato Mîyanên ewnîyenê xeylê cayan bi taybet cinî heqê xo ra bêpar yenê verdayîş û yenê pelçiqnayîş. Nimûneyê tewr verê çiman dagirkerdişê Efrînî yo. Dewleta tirkî û komê girêdayê ci wexto ke hêrişê Efrînî kerdî bî sebebê îhlalkerdişê heqê merdimayî. Ganî warê pawitişê heqê merdiman de maddeyêke hempar ya mîyanneteweyî bêro awankerdiş û vera îhlalkerdişê heqê merdimayî bêveng nêrê verdayîş."

 

'Gerek ma wicdanê xo goşdarî bikerê'

 

Avûkat Gulê Bekendî zî da zanayîş ke karê avûkatî karêke wicdanî yo û wina va: "Ganî ma verê wicdanê xo goşdarî bikerê û verê ke ma cîyayî bikerê mîyanê şaran ma heqê heme kesan bipawê. Gerek qanûn merdiman bipawê û seba averşîyayîşê komelan bo. Seba herkes komel de bibê wayîrê heqê xo. Mîyanê komelî de seba ke cinî wayîrê rol û mîsyonêke girîng ê ganî heqê cinîyan bi qanûnan bêrê pawitiş û cinî nêrê pelçiqnayîş. Seba çareserkerdişê problemê cinî û komelî gerek cinî warê huqûqî de wayîrê vatiş û heqê taybet bê."