ÊLIH - Hepsîyo bi nameyê Medenî Varolo ke hepisxaneyê Tîpa L yê Rîze de maneno, 3 aşmî yo nêbenê nêweşxane.

 

Tirkîya de hepisxaneyan de 410 bi giran, hezar û 154 hepsîyê nêweş estê. Hepisxaneyê Tîpê L yê Rîze de hepsî binê şert û mercê giran de cuyenê.

 

Waya Medenî Varolo ke hepisxaneyê Tîpa L yê Rîze de maneno, Ruken Val dîyar kerde ke rewşa birayê aye giran bîyo û bi birînê hîrê guleyan hepisxane de yeno tepiştiş û wina va: "Ma hewl danê şêrê heme pêvînayîşan. Her rey ma rastê tedayan yenê. Birayê mi di serre verê ame tepiştiş. Hîrê gule gênabi ey ro. Verê ke derman bikerê eştî hepisxane. Bi hîrê aşmî yo ey qet nêbenê nêweşxane. Rewşa ey her ke şino xirab beno.

 

'Leşkerî cigêrayîş kenê'

 

Rukene dewamê qiseykerdişê xo de arde ziwan ke hepisxaneyan de zaf nêweşî estê û wina va: "Heta nika hepisxaneyê Tîpa L yê Rîze de çend rey ame rojeve. Hepsî problemê cidî cuyenê. Nînê dermankerdiş. Nêbenê nêweşxane û revîr. Koxuşê înan, werdê înan xeylê xirab ê. Baş wey nêbenê. Cezayê hucre danê înan. Keyeyî pêvînayîşan de di, hîrê rey yenê cigêrayîş. Verê nê de hepsî zî yenê cigêrayîş. Cigêrayîş zî hetê  leşkeran ra yeno kerdiş. Verê nê de leşkerî bi hawayêke sîstematîk serê koxuşan de gênê. Rojname û name bi kêfî yenê komkerdiş."