Berîtan Canozer

 

DÊRSIM - Dêrsimijan dîyar kerdî ke hêrişê vera xoza eynî wextî vera bawerîyan o û dayî zanayîş ke seba ke komelêke xoza hes kenê, bi taybet hêrişê xozaya înan yena kerdiş û vatî ê fek xozaya xo ra vera nêdanê, ê do tîya ra tepya her darêke ameya veşnayîş darêke bîn biramnê.

 

Qezaya Pilûr û Hozatê Dêrsimî de bi hezaran hektar daristan bi bombarduman û topvaranî bi aşmêke yenê veşnayîş. Mintiqa de cuya xeylê ganeyan zî kona xeter.

 

Hozat û Pilûr de bi sebebê asayîşê mudaxaleyê şewatî nîno kerdiş û nê rojan dewa Pulebargî warê daristanî zî veşa. Aktîvîstê xozaya Dêrsimî şewat tefnayî û şarê Dêrsimî vera şewatan bi reaksîyonê.

 

Cinîya bi nameyê Fadîme dîyar kerde ke ê bi meymanî Denîzlî ra ameyê Dêrsim û roja ke ameya heta nika şewat esto û va: "Ma xoza û hewayê Dêrsimî hes kenê û her serre yenê tîya. Bi taybetî ciwanî yenê. Xozayêke wina weş qetil kenê. Ma çi nê herre ra wazenê. Bi qetilkerdişê xoza merdiman zî îşkence kenê. Dewlete nêverdana kes şiro mintiqayê ke şewat ci esto û wazena her ca çin bibo."

 

'Hêrişê bawerîyanê ma kenê'

 

Cinîya bi nameyê Zeynepe zî dîyar kerde ke wa destê xo xoza ra biancê û Dêrsim azad verdê û wina va: "Hewayo pak yê verê ê a Dêrsimî çin o. No şewat tesîrê nebat û heywananê ma zî keno. Ma bi tesîr benê. Bi seyan heywanî merdî. Nêverdenê kes şewat bitefno. Hêrişê vera xoza eynî wextî de vera bawerîyan o.”