COLEMÊRG - Rojhelato Mîyanên, ro Tirkiye û Îran de krîzê ekonomî zêde beno. Îran de dovîz û Tirkîya zî Dolar berz beno. Cinîya bi nameyê Pervînde Huseyina ke bi bazirganîyê sînorî debara xo kena, dîyar kerde ke sebebê krîzê Rojhelato Mîyanên ê şer  û zordestîyê dewletan o.

 

Xêrcê Tirkîya, Îran de zî krîzê ekonomî her roj zêde beno û hetê rejîmî ra bi tu hawayî gamê girîng nînê eştiş. Serra 2018an de dovîz berz bi û pereyê Îranî her roj qîmetê xo vindî keno. Cinîya bi nameyê Pervinde Huseyîna ke sînorê Esenderî yê Geverê de bi perîn û fîstanê Îranî ana pê bazirganî kena, dîyar kerde ke Rojhelatê Kurdistanî de krîzê ekonomî zêde beno û va ke Tirkîya û Îran seba politikayê şaş nika ver bi îflasbîyayîşê şinê.

 

'Sînor de leşkerî berardişê ma desteser kenê'

 

Pervinde dewamê qiseykerdişê xo de bale ante serê bazirganîyê sînor û va ke sînor de leşkerî înan rê zehmetî vejenê û wina va: "Ez bajarê Urmîye îran de cuyena. Bi serran o perîn û fîstanê ke bi destê xo viraznena, ana Tirkîya roşena. Bi bazirganî dir ez debara xo kena. Ez berardişê xo twer zêde Gever de roşena. Bi çend serre yo Îran de krîzêke pîl esto. Her roj pereyê ci bêqîmet beno. Ez her hewte 2 rey kiras û fîstanan ana tîya roşena. Her ameyîşê xo de ez 20 perçeyê perîn û fîstanan ana. Sînor de ez zehmetiyê pîlan ancena. Leşkerî ma rê zaf zehmetî vejenê. Zafê reyan berardişê ke ma anê desteser kenê. Tedayê ke ma Îran de vînenê, Tirkîya de zî ma eynî çî vînenê. Ez 7 serre yo bi bazirganiyê sînorî debara xo kena. Îran de rejim hem destûr nêdano ke cinî bixebityê û hem zî qimetê pereyê Îranî nêmendo. Tirkîya de zî eynî çî esto. Her roje zem çîyêk rê yeno kerdiş. Bi serran o Îran de krîzê ekonomî esto. Rejîm destûr nêdano ke şar bixebityo. Ma yanê ke Tirkîya de bazirganî bikerê, ma tîya zî eynî probleman dir rî bi rî manenê."

 

'Eke nika Rojhelato Mîyanên de krîzêke ekonomî bibo, sebebê nê çî şeran de israrkerdiş o'

 

Pervinde arde ziwan ke Tirkîya û Îran seba politikayê bîyaye ekonomî de averşîyayîşêke bi dest nêkenê û wina va: "Îran de xebata cinîyan sey şer yena vînayîş. Warê ekonomî de heqê cinîyan bi tu hawa çin o. Bi rastî bi bazirganî merdim politikayê ekonomî zî tewr baş vîneno. Eke nika Rojhilato Mîyanên de krîzêke ekonomî bibo, sebebê nê şeran de israrkerdiş o. Politikayê rejîmî krîzê ekonomî hîra keno. Xizmetê şerî, Rojhelato Mîyanên ver bi îflasbîyayîşêke kûr rê beno. Tirkîya de Dolar zêde beno, şarê Tirkîya êdî nêeşkeno dayîşûgirewtiş bikerê. Îran de zî dovîz berz beno. Seba çi? Seba ke xizmet şer rê yeno kerdiş. Ez mabêne di dewlatan de bazirganî kena, la ez nêşkena bikera. Ma rê probleman vejenê. Ganî fek politikayê şaş vera bidê. Eke no krîzê ekonomî nêro çareserkerdiş Rojhelato Mîyanên bi gelemşeyêke pîl dir rî bi rî bêro. Berjewendîyê şerî ra zêde, gerek berjewendîyê seba şarî esas bêrê girewtiş. Nika padayîşê beyrayê sînor anê rojeve no çareserî nîyo. Bi padayîşê berê sînorê Suriya û yan zî sînorê welatê bîn problemî do tewr kûr bibê."