Dîlan Babat

 

ENQERE - Aynur Kiraçe Pirdê Doksanaltilarî sero bi rî yê huye heme kesan rê vana ‘rojbaş’ û boxacayê ke bi destanê xo viraşta roşena. 

 

Aynur Kiraçe Pirdê Doksanaltilarî yê Anqara sero, saetê sibayî de dezgeyê xo akena û boxacayê ke bi destanê xo viraşta roşena. Kiraçe bi rîyê xo yê huye yena zanayîş û bi çekuya ‘rojbaşî’ heme kesan pêşwazî kena û bi enerjîyê xo yê pozîtîfî bala heme kesan ancena. 

 

Şone pakîya keyeyan zî

 

Aynure ke 7 aşmî yo tîya de xebitîyena badê îflaskerdişê şîrketê xo yê muhasebeyî betal mende û no proses de fek mêrdeyê xo ra vera daye û nika tena serê xo cuyena. Aynure bi pereyê boxacayan ewnîyena domananê xo û keyeyê xo de zî karê destan kena û roşena. Sewbîna wextê xo de zî şona pakîya keyeyan.

 

Sere de vajî beno ke delu ya

 

Aynure qiseykerdişê xo de daye zanayîş ke 7 aşmî yo tîya de dezge akena û wina va: “Ez heme kesan rê vana rojbaş, la seba rotişê boxacan wina nêvana. Ez wazena ke merdimî xo baş hîs bikerî. Seba ke merdimî bi hawayo baş dest bir oje bikerî, ez înan rê vana rojbaş.”

 

Cinîyî bê alternatîf nîyî

 

Aynure qiseykerdişê xo yê peyênan de qala rindîya destpêkerdişê roje kerde û wina qedênaye: “Verê cû mi karê muhasebeyî kerdêne. Ez xeylê kesan reyde sohbetan kena. Mabenê ma de têkilîya komelkî virazîyena. Ez rojêk nêra tîya mi pers kenî. Wexto ke ez zî înan nêvînena, ez pers înan kena. Badê ke ez û mêrdeyê xo ma yewbînan ra fek vera dayî, ez û lajê xo tena mendî. Xeylê prosesê mi yê zehmetîn derbaz bîyî. La mi çong nêrona. Cinîyî bê alternatîf nîyî.”