Lîlav Elî-Ferîde Zade 

 

ŞEHBA - Konferansê Meclîsê Keyeyê Şehîdan  bi siloganê ‘Meşê şopê şehîdan temînatê xelasîya Efrînî yo’ û bi tewrbîyayîşê 400 delegeyan ame viraştiş. Keyeyê şehîdan dîyar kerdî ke şehîdî doz û bîyayîşê înan î û seba hefgirewtişê şehîdan do têkoşînê azadîye berz bikerî.

 

Çarçeweya Konferansê 6. yê Meclîsê Keyeyê Şehîdan de dayik û cinîyê şehîdan qisey kerdî û dîyar kerdî ke hêzê dagirkerî bi hêrişan nêeşkenî omidê ma bişiknî, çimkî omidê ma şehîdê ma yî. Babete ser o Îdarekara cinîyê şehîdan yê herême Sihan Hisên, cinîya Şehîd Remezanî Fetma Şêx Bilo, Sereka Dezgeyê Kar û barê Komelî Erîfe Bekir û cinîya Şehîd Şahînî Nesrîn Cimoye Konferansê 6. yê Meclîsê Keyeyê Şehîdan de qisey kerdî.

 

Subihan Hisêne qiseykerdişê xo de wina va: “Ma bi ruhê 15ê Tebaxe Konferansê Keyeyê Şehîdan dar fînenî. Konferans mîyanê xeylê zehmetîyan de pê yeno û gamêk gird yeno eştiş. Konferans do dagirkeran rê bibo cewab. Ewro heme delegeyî konferansî de ca gênî. No yeno mehneya serkewtişî û temînatê xelasîya Efrînî.”

 

Fetma Şêx Biloye qiseykerdişê xo de daye zanayîş ke Konferansê 6. de rewşa siyasî, rêxistinî, kar û xebatî ameyî munaqeşakerdiş û do agêrayîşê Efrînî xo reyde bîyaro. Sewbîna zî konferans do heme planê Erdoganê çin bikero.

 

'Nê kar û xebatî seba ma serkewtişê pîl ê'

 

Erîfe Bekire destpêkê qiseykerdişê xo de konferansê Rayberê PKKyî û keyeyê şehîdan pîroz kerde  wina va: “Ma sey delege tewrê konferansî bîyî. Konferansî de raporê serrîyek ame wendiş û qala kar û xebatan ame kerdiş. Raporde ame nîşandayîş ke kar û xebatî qezencê tewr girdî yî.”

 

'Verê heme zehmetîyan xebate dewam a'

 

Nesrîn Cimoye zî qiseykerdişê xo de wina va: “Herêma Efrînî de xoverdayîşêk tarîxî ame meşnayîş û dişmen heme teknîkê xo herême de kerd kewre. Kantonê Şehba tewrê heme zor û zehmetîyan xopayan ser de vindeno û xo newera awan keno.”