Zeynep Durgut 

 

COLEMÊRG - Prosesê qedexeyê tebervejîyayîşî de vîrardişê ke lajê dayika Kudrete ra dima mendî, hetê hêzê dewleta tirkî ra ameyî veşênayîş û zerrîya dayika Kudrete reyna veşênayî.

 

Serra 2016î de Gever, Sûr, Nisêbîn û Cizîrî de şarê kurd Xoserîya Demokratîke îlan kerdbî. Badê îlankerdişî hetê dewlete ra qezaya Geverî de qedexeyê tebervejîyayî ame îlankerdiş. Prosesê qedexeyî de pêrodayîşê girdî virazîyayî û qeza hetê hêzê dewlete ra ame bombardumankerdiş, mal ameyî veşênayîş û rijnayîş. Xeylê kesî hetê hêzê dewlete ra ameyî qetilkerdiş. Dayika Suleyman Aksuyî Kudret Aksuye qala qedexeyê tebervejîyayîşî kerde û daye zanayîş ke vîrardişê lajê aye verê çimanê aye de ameyî veşênayîş.

 

'Dewlete qedexeyê tebervejîyayîşî îlan kerde'

 

Lajê dayika Kudrete Suleyman Aksuyî serra 2015î de qetlîyamê Pirsûsî de cuya xo vînî kerd. Hema şînê Suleymanî erd de bî, dewlete qedexeyê tebervejîyayîşî îlan kerde. Qeza hetê hêzê dewlete ra amey bombardumankerdiş û gule reşênayî bajarî ser. Dayika Kudrete bi linganê rûturepalan keye ra vejîya û xo xelisnaye. 

 

'Zilmo ke tarîx de nêameyo dîyiş, Geverî de ame dîyiş'

 

Dayika Kudrete qiseykerdişê xo de qala aye rojan kerde û wina va: “Lajê mi 2015î de qetlîyamê Pirsûsî de cuya xo vînî kerde. Qetilkerdişê lajê mi ra hewteyêk dima qedexe ame îlankerdiş û dewlete dest bi rijnayîşê Geverî kerde. Ez mecbur menda ke keyeyê xo biterikna û şêra Colemêrgî. Zilm estbî, la vera zilmî de xoverdayîş zî estbî. Zilmo ke tarîx de nêameyo dîyiş, Geverî de ame dîyiş. Şar qetlîyamî reyde rî bi rî menrd. Xeylê kesê sivîlî ameyî qetilkerdiş û boyê mergî qezaye de vila bîbî. Cenazeyê cinîyan ameyî teşhîrkerdiş û keyeyê ma ameyî veşênayîş.”

 

'Heme vîrardişê Silêmanî ameyî veşênayîş'

 

Dayika Kudrete qiseykerdişê xo yê peyênan de wina va: “Prosesê qedexeyan de dinya rîyê dewleta tirkî dî. Xeylê ciwanî ameyî qetilkerdiş. Wedarnayîşê qedexeyan ra dima ma agêrayî Geverî. Kerra kerra serê de nêmendbî. Keyeyê ma lajê mi Suleyman viraştbî. Keye bi vîrardişê lajê mi dekerdebî. Fotograf, kompîtur, kitab û kincê Silêmanî ameyî veşênayîş. Ez seba vîradişê lajê xo agêraya Geverî. Mi waştêne ke tena parçeyêk kincê lajê mi bimano.”