Zeynep Durgut

 

COLEMÊRG - Wextê qedexeyê serra 2016an de qezaya Geverî de amebi îlankerdiş, xeylê kesî bi guleyê tîmê taybet ameyî qetilkerdiş. Yew înan ra zî Jêhat Dogma bi. Maya Jêhatî Kiymet dogma wextê qedexe û qetilkerdişê Jêhatî va. 

 

Serra 2016an de qezaya Geverê Colemêrgî de qedexeyê tebervejîyayîşê kuçeyan amebi îlankerdiş û nê netîce de bi hezaran tax û keyeyî ameybî veşnayîş û rijnayîş. Heto bîn ra xeylê kes zî bi guleyên tîmê taybetan ameybî qetilkerdiş. Wextê 79 rojê qedexeyê tebervejîyayîşê kuçeyan ê Geverî yê Colemêrgî de, 9ê Nîsana 2016an de Jêhat Dogma hetê tîmê taybet ra bi 13 guleyan amebi qetilkerdiş. Maya Jêhatî Kiymet Dogma wextê qedexe û qetilkerdişî ma rê qalî kerde.

 

'Lajê mi bi kîmyasal qetil kerdî'

 

Kiymete arde ziwan ke tu merg bi qasê merdişê lajê aye, aye rê giran nêame û va ke qedexeyan de hukmat seba kiştişê merdimayî kewtib nêçîre û wina dewam kerd: "Gama ke Gever de qedexe ame îlankerdiş, bajarî gilêşê xo ver bi merdiş û kiştişê akerd. Tena bêvengî  û taritî estbi. Luye kuçeyan de kewtebî nêçîrê merdimayî. Kesê ke îmkan dî vejîyayî. Remnayîşê merdişî bi. Gama ke qedexe ame îlankerdiş, ez zî vejîyaya. La Jêhat keye de mend. Keye topvaran kerdêne û rişnayî. La bêgûman têkoşîn zî estbi. Berxikê mi sivîl bi. Tu gunayê ey çin bi. Rojêke mi geyra va 'Dayê kimyasal erzenê keyeyan'. Dimayê nê xeberdayîşî telefon qut bi û mi xo bi tu hewayî nêresna lajê xo. Dima ra tv û înternetan û hîn sîteyan xeberî servîs kerdî. Lajê mi bi kîmyasal qetil kerdî û dima ra 13 guleyî ro ci ameyî rişnayîş. Vanê ke ma kîmyasal nêxebitnaw. Eke wina bo çira rîyê lajê mi nêameyne naskerdiş, çira cenazeyê ey perçe perçe bibi? Zulmêke pîl bi ma kerdî. Goreyê înan ma kurd bî û no semed ra tu heqê ma yê cuyayîş çin bi. Cenazeyê lajê mi perçe perçe bi. Perçeyê ey seba otopsî eşrawitî Erzurum. Ez wişta rayîrê qaçaxî şîya mi cenazeyê lajê xo ard. Ez bi lajê serberz bîya seba nê mi hesirê xo nêvarnayî heta ke lajê xo mi defin kerd."

 

'Amancê nê operasyonî çinkerdişê şarê kurd bi'

 

Kiymete dewamê qiseykerdişê xo de ard ziwan ke kiştoxê lajê aye eşkere yê û va ke zulm do rojêke peynî bibo û wina va: "Lajê mi hema zaf qij bi. Hema unîversîte wendêne. Hukmat vano ma sivîlî nêkiştê. Gever û Cîzîrî de kewtibî qetilkerdişê kurdan. Maya Taybet sîvîl bî, Cemîle sîvîl bî, tu çek destê înan de çin bi. Her cayê Kurdîstanî de bi hezaran sîvîl kiştê. Dewlete bi temamê artêşa xo eşte serê geverî. Bi çekê tewr giran merdimî ameyî kiştiş. Xeberan de 'Gever terorîstan ra ame pakkerdiş' servîs kerdî. Kiştiş, topvarankerdiş û rijnayîş dewlete sey serkewtişêke pîl îlan kerd. Mi lajê xo Wan de defin kerd. Lajê mi seba ke herra xo terk nêkero Gever de mend. Waştine ma hemine biksê û meydan ra wedarnê. Labelê nê plana xo de serkewte nêvejîyayî. Amancê operasyonî çinkerdişî şarê Kurd bi. Ez do peynîya emrê xo de xo ver bîrî. Heta ke kiştoxê lajê mi hesab nêdê, mi rê aramî çin a."