Hîkmet Tunç

 

WAN - Çirrê Bêgirîyî ke her mewsîmê serre de yeno zîyaretkerdiş û bi weşikbîyayîşê xo merdiman matmayî verdeno, hetê qayûm ra seba 49 serran dewrê şîrketêke taybet yeno kerdiş. Endama Tevgerê Ekolojî Seher Kadîr Ataşoglu va: "Qayûm seba heme çimeyê xoza yê qeza biroşo û texrîb bikero projeyan amade keno."

 

Çirrê Bêgirîyê Wanî ke bi heybetê xo bale ancena rastê eleqeyêke pîl yê turîstê mintiqa û xerîban yeno. La qayûm tayînê şaredarî bîyo binê nameyê xebata rekreasyon û restorasyonî çirr dewrê şîrketêke taybet keno. Çirr her mewsîm şarî rê akerdeyo û Çemê Mahîbendî yê çirr wayîr keno zî bi hakê ke Masîyê Încîkefalî danê uca namdar o. Endama tevgerê Ekolojî Seher Kadîr Ataşoglu dîyar kerd ke do çirr bi proje bibo tekel û va zîhniyetê qayûm yê rekrasyon û restorasyonî hetê her kesî ra yenê zanayîş.

 

'Wazenê texrîb bikerê'

 

Sehere da zanayîş ke Çirr rîyê bajar yê vînayîşî yo û wina va: "Încî Kefalî uca boya xo gênê, hakê xo uca de danê ro, xeylê ganeyî tede cuyenê. Nika qayûm bi polîtîkayê xo wazeno uca texrîb bikero. Xebatê rekrasyon û restorasyonî demêke verê Sûka Penîr yê Tarîxî bî sebebê merdişê kesan. Vatî ma do hetê yê tarîxî bipawê, la pêroyî de rijnayî. Wextê rijnayîşî de zî tedbîr nêgirewtî û domanêke qij cuya xo vinî kerd.

 

'Awe do biba tekel'

 

Sehere arde ziwan ke do bi viraştişê peyzaj û derûdorî sînor nêmanê û dimayê bi kîra bidê şîrketî do êdî merdimî do nêeşkê uca de seyran bikerê û do wê kewtişê ci bibo bi pere û va : “Binê nameyê xizmetî de do cuya xeylê ganeyan biko binê xeterî. Ma sey ekolojîstî wazenê ke ganî vernîya nê texrîbatî bêro girewtiş."