Dîlan Babat

 

ENQERE - Partîya Demokratîke ya Şaran (HDP) weçînayîşê 24ê Hezîrane de barajê se ra 10î derbaz kerde û parlementoyê tirkan de cayê xo girewte. HDP do weçînayîşê herêmî de zî eynî serkewtişî qezenc bikero. Serokwekîla Koma HDPyî û parlamentera HDPyî ya Mersînî Fatma Kurtulane dîyar kerde ke do weçînayîşê herêmî de heme qezencê ke hetê qayûman ra şaredarîyê Partîya Herêmê Demokratîkî (DBP) ameyî pelçiqnayîş do tepîya bêrî herînayîş.

 

'Zihnîyeto yew şexsî zî tehemmulê înan nêkerd'

 

Fatmaye destpêkê qiseykerdişê xo de daye zanayîş ke DBP modelê alternatîf aver beno û wina domnaye: “DBP modelê cinî, domanî komel û tebîetî aver berdo. Sîstemêm hemserekî kerdo dewre û cinîyî her hetê komelî de tewrê cuye ameyî kerdiş. Zihnîyetê temsîlkarîya seyyewbînanî ame awankerdiş. Zihnîyeto yew şexsî zî tehemmulê înan nêkerd. Cok ra qayûman eşt şaredarîyan.”

 

'Ma nika ra amadekarîyê xo kenî'

 

Fatmaye dewamê qiseykerdişê xo de înan arde ziwan ser: “Qayûmê ke tayînê şaredarîyê DBPyî bîyî, bi zihnîyetê yew şexsî hereket kenî. Seba ke ma qezencanê xo tepîya bigîrî, ma do têkoşîn bikerî. Ma qezencanê xo ra fek vera nêdanî. Berpirsîyarîya ma esta. Ma nika ra amadekarîyê xo kenî.”

 

'Şar do weçînayîşê herêmî de zî cewab bido'

 

Fatmaye qiseykerdişê xo yê peyênan de va ‘badê weçnayîşî Wezîrê Karê Zerre Suleyman Soylu Hemsereka Pêroyî ya HDPyî gêrayo û tehdit kerdo. Dima ra serekkomar Erdogan zî HDPyî hedef nîşan da’ û wina qedênaye: “Şar do weçînayîşê herêmî de zî cewab bido kesê ke heqê înan xesp kerdî.