Şehrîban Aslan

 

AMED - Maya Emrullah Atilganî HPGyî ke pêrodayîşê Colemêrgî de cuya xo vinî kerd, Fatma Atilgane dîyar kerde ke polîsan dîmenê pêrodayîşê lajê aye cuya xo vinî kerdo bi ci dayê temaşekerdiş.

 

Ame zanayîş ke seba PKKyijê ke tarîxê cîya de pêrodayîşan de cuya xo vinî kerdê, nêverdenê keyeyî şîn ronê. Ame îdiakerdiş ke qeymeqam û qerekolî keyeyê Farqîn, Bismil û Pîranî geyrayê û bi vatişê ‘cenazeyê terorîstan meyarê, şîn medêro' tehdîd kerdê. Keyeyê Emrullah Atilganî yê Colemêrgî cuya xo vinî kerd û keyeyê Orhan Demîr û  Doktor Yaşaran dîyar kerdî ke qerekol û qeymeqamîyê Bismil û Farqînî înan geyrayê û vatê ‘Şima do keyeyê şînî yê dewe nêxebitnê. Keye de zî ronê wa kes nêro'.

 

Keyeyan da zanayîş ke dewlete êdî heta zereyê keyeyê înan zî mudaxale kena û wina vatî: "Çi beno wa bibo ma do şînê domananê xo ronê. Ma do peyser game nêerzê. Ma raywanê rayîrê domananê xo yê bi şeref ê.”

 

'Çîyê ke yenê kerdiş muslumanî nîyê'

 

Maya Emrullah Atilgano ke HPGyij bi û pêrodayîşê Colemêrgî de cuya xo vinî kerd, Fatma Atilgane dîyar kerde ke cenazeyê lajê aye 20 rojan morg de ameyo vindernayîş û wina va: "Laji mi şehîdê Kurdistanî yo. 20 rojan morg de ame vindernayîş. Lajê mi bambardumanê helîkopterî bi 7 embazanê xo dir şehîd kewt. Çi heqê Erdoganî esto wina bikero. Çi ma ra wazenê. Adiro ke kewt zerrîya mi biko zerrîya înan zî. Her kes domananê xo bi zehmetiyê giran pîl keno. Çîyo ke ame sereyê ma wa bêro sereyê înan zî. Nê çîyê ke yenê kerdiş eleqeyê ci bi muslumanî çin o."

 

Fatmaye arde ziwan ke wexto ke cenaze definkerdê goristan ameyo dorpêçkerdiş û wina va: "Heta cenaze ameyî definkerdiş ma bi kamera ameyî taqîbkerdiş. Fotografê ma antî. Ma ra vatî şima nêeşkenê camî de şîn ronê. Vatî keye de şîn ronê."

 

Dîmenê lajê aye pê dayî temaşekerdiş

 

Fatmaye dewam de da zanayîş ke dîmenê pêrodayîşê ke lajê aye cuya xo vinî kerdo pê dayê temaşekerdiş û wina va: "Hêvîya mi Homayî ra esta CDyê lajê Erdogan zî pê bidê temaşekerdiş. Ê çi teda bikerê zî ez rayîrê lajê xo de ya. Lajê mi bi 7 embazanê xo beşdarê karwanê şehîdan bi. Lajê mi Şerwanê Amedî yo. Ez maya Şerwanî ya. Erdogan çi destê ey ra yeno wa bikero."

 

'Polîsan tedayê psîkolojîk kerdî'

 

Waya ey Hasbîye Atilgane zî da zanayîş ke polîsan her wext tedayê psîkolojîk înan rê kerdê û va: "Polîsan pêwa ke derheqê cenaze de heme çî zanayne persî pers kerdêne. Vatî 4 kes zî verê keyeyî de kom mebê. Polîsan rê bêmendêne gerek ma nimte defin bikerdêne. Wexto ke cenaze ame nêverdayî kes biko goristan. Gule rişnayî hewa û sond wendî. Mi va qey roja mahşerî ya. Yê ke ameyî şîn zî ameyî tehdîdkerdiş. Wexto ke ma tedeyê serrê 90an tewr xirab o. Şerêke lêşîn û bêrumet yeno meşnayîş. Ma heme şehîdê Kurdistanî bi hurmet anê xo vîr."