Bêrîtan Canozer

 

AMED - Kubra Çobana ke Farqîn de cuyena, yew cinîya ke pêwa heme zehmetîyan serkewtiş dest kerda. Kubraye bale ante serê girîngîyê piştdayîşî û wina va: "Eke ma bi tena sereyê xo nêeşkê bikerê zî ganî ma camêrdêke ra nê cinîyêke ra piştdayîş bigîrê û ma bi hêzê xo bawer bê.”

 

Farqînê Amedî de 5 serrê peyîn de beşêk pîl yê esnafan cinî yê. Yew nê cinîyan ra zî Kubra Çoban a. Kubraye dîyar kerde ke vatişê ‘mi sey cinîyêke zaf çî bi dest kerdî' zaf girîng o, la tena bi Farqîn sînordar nîyo û wina va: "Merdimî ça benê wa bibê, heqê cinîyan ancax bi têkoşîn yeno bideskerdiş. "Kubraya ke bi 9 serre yo esnafî kena esasê xo de ‘pispora weşikbîyayîşî' de perwerde girewta. Kubra dimayê ke 5 serran sey kuafor xebitya, dima ra fek vera dana û kona sektorê cil û belgan.

 

Kubra arde ziwan ke dimayê ke dikan akena dima qedexeyê tebervejîyayîşê teberî dest pêkeno û wina va: "Mi cil û belgê mintiqa rotêne. Dimayê hedîseyan dikanê mi zirar dî. Mi çîyêk zî xilas nêkerd. Ez demêke nêxebityawa. Dima ra kewta mîyanê cigêrayîşê."

 

Pelçiqnayîşê kede her ca de esto

 

Kubraye qiseykerdişê xo wina dewam kerde: "Kuafor zaf zehmet bi. Reyan ma bi rojan serê lingan de vinderenê. Me werd zî nêwerdêne. Ma zaf kewtêne zor. Sektorê cil û belgan hîna rehet o. Cinî eşkenê her karî bikerê la seba stresî eşkenê bi nêweşiyan zî bikoy. Seba cinîyan karêke bê stres çin o. La mi qetî peyser game nêeşt. Ez kewta mîyanê cigêrayîşî. Hîn wextê mi girewt la dima ra ez kewta sektorê cil û belgan û mi karê xo dewam kerd.”

 

'Ma cinî ma do înan bimusnê'

 

Kubraye dewamê qiseykerdişê xo de wina va: "Camêrdî dimayê wextêke vera karê cinîyan rêzdarî mojnenê ra. Ganî sey objeyê zayendî cinîyêke nêewnenê. No zî gerek ma camêrdan bimusnê. Verê cinî nêeşkayne verê kahwexaneyan ra derbaz bibê. La nika cinî kafeyan danê xebitnayîş."

 

Kubraye tewr peyîn qiseykerdişê xo de veng da heme cinîyan ke wayîr kede xo vejîyê û wina va: "Ma mecbur nîyê binê serdestiyê camêrdan de bicuyê. Ma zehmetîyan cuyenê la ma eşkenê binê nê zahmetiyan ra wirzê. Ma nêeşkê tena bikerê zî gerek ma camêrdan ra nê, cinîyan ra piştdayîş bigîrê. Mi her wext wina kerd. Ez her wext şîya hetkarîya cinîyan. Ez wina serê lingan de menda. Mi xeylê çî zî wina da qebûlkerdiş. Ma bi xo û hêzê xo bawer bî”