MUGLA - Bodrum de cinîyê ke berardişê koyan kom kenê û seba kîrakerdişê tezgahan zaf vayo, serê erdî de fînenê ra û roşenê. Cinîyan dîyar kerdî ke qezencê înan goreyê serrê vîyarte kewtê.

 

Qezaya Bodrumî yê Muglayî ke merkezê tewr girîn yê turîzmî yo, cinîyê ke berardişan koyan ra kom kenê û anê merkez, seba kîrakerdişê tezgahan vayo, erd de fînenê ra û roşenê.

 

Cinîyê ke nêzdîyê 40 serre yo 5 aşmî berardişan koyan ra anê merkez, dîyar kenê ke qezencê înan goreyê her serre zaf kewto.

 

‘Rotiş sey verê nîyo'

 

Dewa Kizilagaçî ra Elîf Şenagaç û Fatma Kiraçe dîyar kenê ke sey verê karê înan baş derbaz nêbeno û Fatmaye wina va: "Ma şaredarî ra destur girewt. Ma serê erdî de fînenê ra û roşenê. Tezgah bi pereyê. Seba ma cinîyan erd ya zî çîyêk nîno dayîş. Bi 40 serre yo ma tîya xebityenê. Qîmê ma kenê la rotiş nêbeno. Kes çîyêke nêgîno."

 

‘Ez bi piştdayîş serê lingan de menda'

 

Yasîme Yilmaza Rîze ra şîya Soke û uca ra zî ameya Bodrum de bi ca bîya, şan de yena ke Fatma û Elîfe verdayê. Yasîme bi 10 serre yo berardişê xozayî roşena û va: “Ma tîya xebityenê û pereyê xo qezenc kenê. Cinîyêke hetkarî da mi. Ez bi piştdayîşî serê lingan de menda. Ya zî mi nêzanayne ez se bikera. Ez hem pere qezenc kena û wextê xo derbaz kena."