RIHA- Parka 4 Nîsane ke hetê şardarîya Xelfetî ra amî viraştiş, dimayê ke qayûm ame êdî xizmet ci rê nêame kerdiş û terkê qedera aye ame kerdiş. Zergûnayî û darê parke wişk bî, peyerayîrî zî ameyî xirakerdiş.

 

Parka 4ê Nîsane 2015an de hetê şaredarîya DBPî yê Xelfetî ra 66in serrgera Rojbîyayîşê Rayberê PKKî Abdullah Ocalanî de, seba bername ci de bêrê pîrozkerdiş amî viraştiş, la nika terkê qedera aye ameya kerdiş. Qeymeqamê qeza Şeref Albayrak ke sey qayûm tayînê şaredarî bi, pakkerdişê parke qedexe kerd, darê parke zî seba nêawdayîş wişk bî. 

 

Dekewtişê parke de tabelayê ‘ma parkanê xo pak bigîrê, bipawê’ bale ancenê û yena vînayîş ke heme peyerayîrê derûdorê parke zî ameyê xirakerdiş. Kamelyayê ke şar tede niştêne ro zî ver bi rijnayîşî yê. Her ca bîyo çop û zafê tenekeyê çopî zî ameyê texrîbkerdiş.

 

Dar û zergunayî wişk bîyê

 

Heto bîn ra warê kayê domanan zî bi pêroyî de ame wedartiş û dar û zergûnayîya parke zî seba bêawdayîşî wişk bîyê. Wareyo ke sey warê sporî ameyne xebitnayîş zî vurnayê otoparke. Parkurê rayşîyayîş zî ameyo texrîbkerdiş û zafê banqê seba roniştişî zî şiknayê ya zî cayê înan ra ameyê wedartiş.