ENQERE - Arîna 13 aşmîya nêweşa astimîya û bi maya xo Esma Yilmaze dir Hepisxaneyê Tîpê T yê hûmara 2yîn ê Riha de manena, rewşa aye her ke şina xirab bena. Pîyê aye Mîhdî Yilmazî dîyar kerd ke dermanê ke yenê dayîş ameyê birnayîş û wina va: "Waştişê sewqkerdişê nêweşxanî yena kerdiş û 5 aşmî dima cewab yena dayîş. Êdî yew serre ya. Lazimî bi werdişê aye esta."

 

Arîna 13 aşmî ya ke nêweşa astimî ya û bi maya xo Esma Yilmaze dir Hepisxaneyê Tîpa T yê hûmara 2yîn ê Riha de manena, rewşa aye her ke şina xirab bena. Maya aye Esma Yilmaze seba veradayîşê bi kontrol fêde bigîra bi hemkarîya avûkatanê xo muracat kerde la heme muracatê aye ameyî redkerdiş. Netîceyê tedayê raya pêroyî û waştişnameyê ke dayî Komîsyonê Heqê Merdiman yê TBMMî, derman seba Arîne ameyne dayîş la ame zanayîş ke dermanî zî birnayîş.

 

Dermanan reyna birnayî!

 

Mîhdî Yilmazo ke 2ê Tebaxe de şi hepisxane dîyar kerd ke dermanê Arîne ameyê birnayîş û wina va: "Seba reaksîyonê raya pêroyî Arîne berdêne revîr. La dimayê wextêke reyna no waştiş ame redkerdiş. No semed ra nêweşîya Arîne zêde bîya. Rewşa aye xirab bena û serê waştişî ra aye benê revîr. La revîr de zî nîna dermankerdiş.”

 

'Seba sewqkerdişê nêweşxane hema cewab çin o'

 

Mîhdî da zanayîş ke tewr peyîn seba pêvînayîşê şîyo û bi psîkiyatrî yê hepisxaneyî dir pêvînayîş kerdo û wina va: "Mi va dermanê Arîne nînê dayîş. Înan zî va çi destê înan ra yeno kenê û no zî têkildayîşê sazgehî yo. Mi sewqê seba nêweşxane zî pers kerd û vatî cewab 5 aşmî ra dima eşkeno bêro. Makîneyê buharî ke mi girewto kan bîyo. Mi va gerek yew newe bêro girewtiş. Êdî kewta yew serre ya xo. Lazimî bi weykerdişêke baş esta. Şitê maya aye êdî qîmê aye nêkena."

 

'Raporê nêweşxane vindî kerdê'

 

Mîhdî tewr peyîn qiseykerdişê xo se va ey raporê Arîne waştê la cewabê ‘rapor vindî bîyê' girewto û wina va: "Aşîya Arîne estbî. Nêweşxane aşîya aye nêkerd, raporan wazenê. Mi persa vatî vindî bîyo. Selahîyetdarêke ez na babete de şîbî verê çin o. Parlamentera HDPî ya Rihayî Ayşe Surucu seba pêvînayîşê muracatê Wezaretê Dade da la waştişê aye ame redkerdiş. Rewşa Arîne her ke şina xirab bena."