Îlham Eloso

 

KOBANÊ - Cinîyê Kobaniyijî derheqê şertê koçberîyê xidar û ageryayîşê koçberê ser herra xo de arde ziwan ke her merdim welatê xo de kêfweş o û vatî ke tu ca nêbeno sey herra merdimî.

 

Netîceyê şerê ke Sûrîya de qewimya de bi milyonan kesî mecbûr mendî ke koçê welatê bînan bibê. Bi milyonan zî merdiman cuya xo vinî kerd, hîn zî bê keye û bê hêvî mendî. Derheqê babete de cinîyê Kobanî yê ke bîyê şahidê koçberîyê xidar vatî: "Ser sînoran ma bî şahidê merdişê xeylê kesan û hesirê mayan ke seba welatê xo ameyne war."

 

'Ma bî şahidê dej û elemê giranan'

 

Maya bi nameyê Wehîda Ehmede arde ziwan ke aye wazena serê herra xo de azad bicuyê û va: "Wextê şerê Sûrîye dest pêkerd heta nika ma bî şahidê dej û elemê giran. Serê sînorê welatê bînan de xeylê kes ameyî kiştiş û veşan ameyî verdayîş. Xeylê kesê ke waştî ageyrê ser herra xo la ya ameyî kiştiş ya zî îşkence vînayî. Nika zî xeylê kes wazenê ageyrê ser herra xo la seba ke hema şer nêqedyayo nêeşkenê ageyrê. Seba Erdogan û hetkarê ey zî xeylê kesî mecbûr mendî koç bikerê û xeylê kesî zî cuya xo vinî kerdî. Ma do vera dagirkerî her wext têkoşîn bikerê. Ma wazenê êdî no şer bi peynî bibo û heme kesî ageyrê ser herra xo. Çunke tu ca nêbeno sey herra merdimî û her merdim ser herrq xo kêfweş o."

 

'Wa kiştişê serê sînoran peynî bibo'

 

Eynî wextî de maya bi nameyê Zelîxa Brahîm ke aye zî serra 2013an de Reqqa ra koçê Kobanî kerda wina va: "Şerê ke Sûrîye dest pêkerd û nika dewam keno şerêke xeylê xidar bi. Gelek kes seba şer ra remayî û koçê welatê sey Lubnan, Tirkîya, Almanya û welatê sey bîn kerdî. Xeylê kesî zî sînoran de ameyî qetilkerdiş. Tu asayîşê sînoran nêmendo. Wexto ke ma zî koçê Kobanî kerd ma zaf zor û zehmetî ant. Şertê koçberî zaf xidar o. Serê sînoran de ma bî şahidê merdişê xeylê kesan û hesirê mayê ke seba welatê xo ameyne var. Wa kiştişê serê sînoran peynî bibo û heme kes bimeşnê ke ageyrê ser herra xo. Aramî û cuya ser herra xo cîya ya. Ganî peynîya no şerî bêro. Ma wazenê êdî ma mîyanê aştî û azadî de bicuyê."