MÊRDÎN - Serekîya Dîwana KCDî Mekîye Guzele bale ante ser şewatê daristanan yê seba operasyonê leşkerî Kurdistan de veşnenê û wina va: “Wazenê bi nê polîtîkayan Tirkiye açarnê warê adir. Eke reaksîyon nê ro mojnarayîş, do no adir heme Tirkîya dorpêç bikero.”

 

Kurdistan de her serre hamnan û wisar de binê nameyê operasyonan de bombarduman yeno kerdiş û bi hezaran dar û tewirê ganeyan yenê çinkerdiş. Emsar Amed, Dêrsîm, Şirnex û Mêrdîn de seba şewatê ke vejîyayî bi hezaran hektar daristan ameyî veşnayîş. Mintiqaya Omeryan de 25ê Temmuze de qedexeyê tebervejîyayîşê kuçeyan ame îlankerdiş û dima ra şewat vejîya û 2 rojan dewam kerd. Serekîya Dîwanê KCDî Mekiye Guzele dîyar kerde ke goreyê zanayîşê ke dewijan ra girewtê, şewat bi zanebîyayîş vetê.

 

'Şewat bi zanabîyayîş ameyo vetiş'

 

Mekîye arde ziwan ke dewijan dir pêvînayîş kerdê û wina va: "Bi qasê ke ma fam kerd şewat bi zanebîyayîş ameyo vetiş. Pêwa ke dewijan zanayîş dayê selahîyetdaran, îtfaîya nêeşrawitê. La goreyê zanayîşê hemwelatîyan xeylê îtfaîya şîyê mintiqa. La dewijan va çîyêke wina çin o."

 

Mekîye da zanayîş ke dewijan bi îmkanê xo şewat tefnayo û va: "No polîtîkayêke yo. Pêwa OHAL ameyo wedartiş zî dewijan va OHAL dewam keno. Vanê OHAL qedyayo la caardişê zaf cîya ma vînenê. Bi şewatan yeno amanckerdiş ke dewijan mintiqa ra dûr bifîno. Licê, Dêrsim û Pasûr de zî şewat vejya. Dewijan dîyar kerdî rewşa ke şewat vejê çinbîyo û no şewat bi zanebîyayîş ameyo vetiş. Seba tefnayîşî zî ekîbe nêeşrawitê."

 

Mekîye veng da heme sazgehê demokrasî û bi wijdanan û va ganî vera şewatan bêveng nêmanê.