Gulîstan Azak

 

AMED - Bazirganan dîyar kerdî ke şar êdî nêeşkeno çîyêk bigîro no semed karê înan zî nêbeno û va: “Cêbe kesî de pere çin o. Ê ma zî kasaya ma de pere çin o. Muşterî êdî vera girewtişê tena ewnîyenê."

 

Krîzê ekonomî tewr zêde xo sûk û bazaran dane mojneno ra. Bazirganan reaksîyon vera krîzî mojnayî ra û dîyar kerdî ke êdî şar ameyo sewîyeya ke nêeşkenê çîyêk bigîrê û va cêbe şarî de pere çin o.

 

Qezaya Baglarî de cinîya bi nameyê Kevser Akkoyuna ke 4 serre yo bazirganî kena va hetê ke krîz bêro nimte nêmendo û wina va: "Her kes krîzê ekonomî vîneno. Biewnê kargerîya mi veng a. Ez dikanê xo de karêke bîn zî kena. Ez papik û lîfan viraznena û roşena."

 

'Muşterî tena ewnîyenê'

 

Kevsere da zanayîş ke muşterî yenê ewnîyenê û şinê û wina va: "Reyan zî yenê çîyêk gênê vanê binusne. Ma nêeşkenê debara keyeyê xo bikerê. Heto bîn ra ma konê zehmetî kîrayê dikanî bidê."

 

Bazirgan Ayşe Tanişe zî wina va: "Krîz her ke şino pîl beno. Xeylê rey roj de ma yenê la ma çîyêk nêroşenê. Muşterî cilan ecibnenê la nêeşkenê bigîrê."

 

Seval Balta zî reaksîyon vera krîzî da û va reyan karê înan qetî nêbeno û reyan zî bi zirar malê roşenê û qezencê înan qetî nêbeno.