AMED - Yekbun Yaşa ke fîgurê mezopotamyayî serê seramîkan de neqş kena, atolya Çînî ya taxa Zîya Gokalp ya Sûrê Amedî de akerda, tarîx bi cuyayîşî dir ana têhet.

 

Yekbun Yaşa ke bi xeylê pêşangehan kulturê mezopotamyayî dana naskerdiş, eynî wextî de perwerde dana bi seyan cinîyan û cinîyan rê warê îstîhdamî akena.

 

Yekbuna ke amancê aye hunerê çînî yê tarîxê mezopotamyayî de wayîrê vîyartoxêke hezar û 500 serre yo gane bikera, dima ra perwerdeyê no hunerî geyrena, 2008 de Amed de atolye akena.

 

'Wayîrê serkewtişê mi cinî yê'

 

Yekbune dewamê qiseykerdişê xo de arde ziwan ke huner seba ci manayêke girîng îfade keno û va çimeyê îlhamê aye cinî yê. Yekbune qiseykerdişê xo wina dewam kerde: "Huner seba mi cinî yo. Seba awankerdişê hunerî cinî yê. Ez deyndarê cinîyan a. Cinîyê keyeyê mi çimeyê serkewtişê min ê. Camêrdan vatêne çi karê to bi huner dir esto. La cinîyan her wext piştdayîş da mi."

 

Motîfê Mezopotamyayî

 

Yekbune bale ante serê xebatanê xo û va aye fîgurê mîtolojîk xebitnena û tewr zêde motîfê Mezopotamyayî yanî Ahura,Mazda, Melekê Tawus, Şahmaran xebitnena. Yekbune wina dewam kerde: "Motîfê fistanê adetî yê cinîyê Mezopotamyayî zî seba mi zaf girîng ê. Rengê cil û belgê adetî seba mi zaf girîng ê. Amed bi taybet zî qezaya Sûrî warêke hunerî yê girîng o. Ez zaf kêfweş a seba ke uca de ya. Huner bi destê cinîyan eşkeno manayîn bo. Ez veng dana heme cinîyan. Awankerdoxê hunerî şima yê. Ez heme cinîyan dawetê atolye kena."