ENQERE - Sekreterê Cinîyan yê KESKî Gulîstan Atasoye dîyar kerde ke OHAL êdî bi qanûnan bi ca bîyarê û wina va: "Ma do tîya ra tepya zî têkoşînê xo dewam bikerê. Seba cinîyan prosesêke tewr zehmet dest pêkeno."

 

Tirkîya de OHAL 20ê Temmuze 2016an de ame îlankerdiş, serê ci ra 2 serrî derbaz bi û pêroyî de 7 rey ame dergkerdiş û 18ê Temmuze de ame wedartiş. La vera OHALo ke ame wedartiş pêşnûmeqanûnê 25 maddeyan ra ameyne meydan Heyetê Pêroyî yê TBMMî de ame qebûlkerdiş.

 

Sekretera Cinîyan yê KESKî Gulîstan Atasoye derheqê prosesê OHAL û tedayê serê cinîyan de qisey kerde.

 

'Seba cinîyan proses giran beno'

 

Gulîstane va OHALo ke 2 serran dewam kerd nika bi qanûnan mende kerdê û îqtîdar na rewşe bi vatişê ‘OHAL ame wedartiş' manîpule keno. Gulîstane da zanayîş ke ganî rastî her wext bêrê qalîkerdiş û wina va: "OHAL ame wedartiş la bi hawayêke fîîlî û qanûnî ame mendekerdiş. Seba cinîyan ma eşkenê vajê ke prosesêke tewr zehmet dest pêkerdo."

 

'Sîstemo newe cinîyan dişmin vîneno'

 

Gulîstane dewamê qiseykerdişê xo de da zanayîş ke prosesê OHALî de vera destkewteyan her wext hêriş virazyayo, caardişê zayenperest vejîyayê sewîyeya tewr berz û wina va: "Cinî her ca de rastê şîdet, tacîz û tecawizî ameyî. Heto bîn ra ma prosesêke asayîşê karî bi pêroyî de ameyo çinkerdiş cuyayî. Hukmatî bi KHKyê ke vetî peynîya di serran de weçînayîşê rew yê 24ê hezîrane kerd û rejîmêke newe awan kerd. Heto ke xo rê dişmin vîneno cinî yê."

 

'Hezar û 67 endamê cinî ameyî îxrackerdiş'

 

Gulîstane bale ante ser caardişê OHAL û KHKyan û da zanayîş ke heta nika bi KHKyan hezar û 67 endamê înan yê cinî ameyê îxrackerdiş û heme bername û xebatê înan zî bi sebebê OHALî ameyê astengkerdiş.

 

'50 ra zêde kedkaran întîxar kerd'

 

Gulîstane dewam de va ke prosesê OHALî de 50 ra tewr zêde kedkaran întîxar kerdê û wina va: "îxracan bi hetêke zî karo krîmînalîzasyonî vînayo. Heme kedkarê ke AKPî ra nêbîyê sucdar ameyê vînayîş. Bi îxracan têkoşînê kede ameyo krîmînalîzekerdiş."

 

Berpirsîyarîyê rêxistinê kede zêde bi

 

Gulîstane da zanayîş ke OHAL de walîyê ke vera tacîz û hêrişê zayendî tedbîr nêgirewtêne, çalakiyê KESKî bi sebebê 'asayîşî' asteng kerdê û wina va: "Bi vurnayîşê rejîmî dir berpirsyariyê kedkaran zêde bi. Ma do têkoşînê meşrû tîya ra tepya zî dewam bikerê.”