WAN - Endama Heyetê Îdareyê DTSOyî û karsaz Nevîn Île dîyar kerde ke bêsîstemîyê bêtêduştîyê zayendî tewr zêde warê ekonomî de yeno vînayîş û wina va: "Cinî warê ekonomî de çin yenê hesibnayîş, merkezê berardişê polîtîkayan de zî ca nêgênê. Îdareyê ke yenê weçînayîş de zî cinî nînê vînayîş."

 

Komeleyê Karsazê Cinîyan yê Rohelat û Başurê Rojhelatî (DOGUNKAD), çerçeweya projeyê ‘Hemkarîya Mabêne Heyetê Komelê Sivîl yê Cinîyê Rojhelat û Başurê Rojhelat û Awankerdişê Torran’ de hedef kenê 10 bajarê Kurdistanî de kombîyayîş bikerê. Endama Heyetê Îdareyê Sanayî û Bazirganî yê Amedî (DTSO) û DOGUNKADî Nevîn Île derheqê projeyê ke meşnenê de qisey kerde.

 

'Ma hewl danê problemê cinîyan fam bikerê'

 

Nevîne dewamê qiseykerdişê xo de va ke serrêke verê dest bi xebatê projeyî kerdê û va hedefê înan o yo ke 10 bajaran de îstîhdamê cinî û rewşa karsazê cinî analîz bikerê. Nevîne wina va: "Ma waşt ma cinîyan dir munaqeşe bikerê. No het ra Wan de zî pêvînayîşêke wina girîng bi. Ma wazenê problemê cinîyan bimusê û esas de polîtîkayan aver berê."

 

Nevîne da zanayîş ke kombîyayîşê înan yê Wan û Amedî zaf baş derbaz bîyê û va do xebatê înan Colemêrg, Dêrsîm,Riha, Êlih û Sêrt de dewam bikerê. Heto bîn ra da zanayîş ke dimayê nê kombîyayîşan peynîya serre de Amed de konferansêke pîl viraznê.

 

'Bêtêduştî tewr zêde warê ekonomî de yeno vînayîş'

 

Nevîne da zanayîş ke cinî mekanîzmayê qerarî de ca nêgînê û no zî rayîr verê problemê cidî akeno û va yew hedefê înan o yo ke cinî mekanîzmayê qerarî de ca bigîrê û probleman tespît bikerê. Nevîne qiseykerdişê xo wina qedêna: "Cinî warê ekonomî de çin yenê hesibnayîş, merkezê weçînayîşê polîtîkayan de zî ca nêgînê. Îdareyê yenê weçînayîş de zî cinî nînê vînayîş."