Zeynep Durgut

 

WAN - Wextê verê û hetanî nika Kurdîstan de hêrişê serê goristanan bêmabên dewam kenê. Gorîstanê ke vera nê hêrişê ke yenê kerdiş de bi texrîbatêke pîl dir rî bi rî manenê. Derheqê hêrişê serê goristanan de Parlementera HDPyî Huda Kaya qisey kerde.

 

Kurdîstan de her roj serê goristanan de hêriş virazênê. Tewr peyîn Goristanê Yenîkoyî qezaya Baglarê Amedî reyna hetê kesê nênasan ra saetê şewe de hêrişê gorê şerwanê HPG û YPGî kerdî. Derheqê hêrişê ke serê goristanan de yenê kerdiş Parlementera Partîya Demokratîke ya Şaran (HDP) ê Stenbolî Huda Kaya şîrove kerde.

 

'Merdim erje tewr pîroz a'

 

Hudaye bale ante serê bawerîyan manaya ruh û merdimayî û wina va: "Tu dînan de hêrişê serê goristanan heqdar nêameyê vînayîş û tu rîpelê quran de wina nêameyo nuştiş. Metnê nuşteyî de zî yeno vatiş ke kesê ke merdan acis kenê bi tu hawayî nînê efûkerdiş. Quran de sureya îsra ya 71in de wina yena vatiş, 'Merdim dinya de sey bîyayîşê tewr pîroz ameyo viraştiş' La biewnê çîyo baldar o yo ke merdim sey estbîyayîşê tewr bi şeref ameyo awankerdiş. Tîya de merdim sey bîyayîşê tewr bi erj ameyo vînayîş. Na sure de mesajo ke yeno dayîş o yo ke merdim kam dîn û bawerîyan ra beno wa bibo o/a bîyayîşêke tewr pîroz o /a. Şîroveyê ma vera ciwîyayîşî wina yo. Merdim wexto ke cuyeno zî pîroz o. Seba ke merdim azadîya xo bi dest bikero, lazim nîyo ke bawerî û dînê ma ra bibo. Tena merdim nê her bîyayîşêke pîroz o. Zanistîyê dinya û bawerîyan de her bîyayîşêke wayîrê ruh bi erj û pîroz o."

 

'Sîyaseto bîyaye rayîr vera hêrişê serê goristanan akeno' 

Hudaye arde ziwan ke polîtikayê zulmî her wext erjê komelî hedef ameyê girewtiş û va ke vera bawerîyan hêriş heqeretêke pîl o û wina va: "Merdimê ke cuya xo vinî kenê, bedenê înan goristan de êdî emanetê merdimayî yê. Merdimî çiqas dişminê yewbînan bibê zî hêrişê serê bedenî bi tu hawayî nîno qebûlkerdiş. Seba nê zî şîdetê ke nika Tirkîya de virazênê û nê politîkayê ke yenê meşnayîş, ameyê sewîyeyêke tehluke. Sîyaseto ke îqtîdaro bîyaye meşneno beno sebebê hêrişê ser cenaze û gorîstanan. Tirkîya de wextê definkerdişê cenazeyan de ma bi hezaran zahmetî antê. Cenazeyê ke yenê definkerdiş hetê hêzê dewlete ra bi hêrişêke pîl dir rî bi rî manenê. Wextê definkerdişê cenazeyan de şat bi zulmêke pîl dir rî bi rî manenê. Nimûneyê tewr pîl hêrişê ke vera definkerdişê Hatun Altun virazyabi û serê bedenê Ekîn Wane de bi. No hêriş seba Tirkîya şermêke pîl bi. Hêrişê serê cenaze û goristanan merdimayî rê şermêke pîl o."

 

'Ganî kesê merdimayîya xo vîra kerdê ma bîyarê vîrê înan'

 

Hudaye qiseykerdişê xo peyînan de arde ziwan ke hêrişê serê goristanan dişmanîyê vera bîyayîşê merdimayîya û wina va: "Beno ke herkes ewnîyayîşê înan yew nêbo û beno ke bawerî cîya bê, la na nîna manaya ke kes hêrişê serê cenaze û goristanan xo rê heqdar bivîna. Nika komelê Tirkîya de problemo tewr pîl o yo ke merdimayî puyeno. Têkoşînê merdimayî de komelê Tirkîya îmtîhan derbaz nêkerd. Ganî ma newe ra bi hêz bikerê. Kesê ke merdimayîya xo dayne xovîrrakerdiş ganî ma bîyarê vîrê înan."