Dîlan Babat

 

ENQERE - Pî Mîhdî Yilmazî dîyar kerd ke şert û mercê zindanî vera bedenê Arîne de birînî vejîyenî. Parlamentera HDPyî Meral Daniş Beştaşe dîyar kerde ke ganî îşkenceyê serê domanan bêro peynîkerdiş û qanûnê domanê mabenê 0-6î nêeşkenî zidanan de bimanî bêro vetiş.

 

Goreyê raporê 2018î Tirkîya de 668 domanî tewrê dayika xo zindanan de manenî. Nê domanan ra yew zî Arîne ya. Arîne 13 aşmîya xo de bîye nêweşê astime. Esma Yilmaze tewrê kênaya xo Arîne Zindanê Tîpa Tyî ya Riha de manenî. Her çend ke xeylê muracatê Esmaye seba serbestveradayîşê kontrolî bibî zî qet feyde nêkenî. Badê zextê pêroyî û waştişnameyan derman dîyayî Arîne.

 

Mîhdî Yilmazî 19ê temmuze de şî pêvînayîşê cinî û kênaya xo. Yilmazî dîyar kerd ke zextan vera derman danî kênaya mi û hertim aye benî nêweşxane. Yilmazî da zanayîş ke 5ê tebaxe de badê netîceyê tehlîlan vejîya raste ke do tedawîyek newe bêro kerdiş. Babete ser o Mîhdî Yilmaz û Parlamentera Partîya Demokratîke ya Şaran (HDP) Meral Daniş Beştaşe qisey kerdî.

 

Mîhdîyî qiseykerdişê xo de qala rewşa cinî û kênaya xo kerd û wina va: “Zindanê Mêrdînî de qet nêbo hewaya pakî estbî. La Zindanê Riha de hewa daxî çin o. 33 kesî koguşêk de manenî. Germîya hewa 40 derece ya. Merdimê pîlî daxî nêeşkenî ewca de bimanî do domanî senî bimanî. Germî vera klîma klîma nênanî.”

 

Mîhdîyî qiseykerdişê xo yê peyênan de zî wina va: “Arîna 13 aşmî germîya hewayî vera zaf tesîr bena. Bedenê kênaya mi de birînî vejîyenî. Psîkolojîyê cinîya mi Esmaye xira bîyo. Çimanê aye vera de kênaya ma helîyena. sûcê cinî û kênaya mi çîna yo. Ganî Arîn û Esmaye bi hawayo lez serbest bêrî veradayîş.”

 

Parlamentera HDPyî ya Sêrtî Meral Daniş Beştaşe seba Arîne waştişname daye Komîsyonê Heqê Merdiman yê Meclisî û wina va: “Arîna 13 aşmî 9 aşmîya ke zindan de ya. Cezaya ke dîyena dayikan, dîyena domanan zî. Kesê pîlî daxî nêeşkenî şert û mercê zindanan de bicuyî. Şertê Arîne îşkence yî. dayika aye kenî mehne û îşkence bi Arîne kenî. Eke Arîne nêra tedawîkerdiş, beno ke problemê weşî yê cîya bivejîyî. Ganî bi hawayo lez fek bêhuqûqî ra bêro veradayîş. Arîne nêweşa astimî ya. Kesê astimî rê hewayê pakî muhîm o.”

 

Merale qiseykerdişê xo yê peyêna de zî wina va: “Ganî Esma û Arîne bi şertê kontrolê edlî serbest bêrî veradayîş. pîyê Arîne cihazê hewayê pakî herînayo. La cayêk wina qelebalix de cihaz feyde nêkeno. Xo bikerên herinda Arîne. Arîne nêeşkena nefes bigîra. Binê çimanê Arîne mor benî. Ganî qanûnê domanê mabenê 0-6î nêeşkenî zidanan de bimanî bêro vetiş. Domanê ke zindanan de manenî tebîet ra dûrî benî. Na rewşe teberê qanûn û heqê domanan a.”