Lîlav Elî-Totlîn Mohemed  

 

ŞEHBA - Xebatkara Heyva Sor a Kurdistanî Mejdolîn Sînoye vengê hîsgerîye daye heme komeleyê heqê merdiman ke bêvengîya xo bixeripnî û wina va: “Veng bidêne şarê Efrînî yê ke kampa Şehbaye de bi ca bîyî. Ganî heme komeleyê heqê merdiman yê mîyanneteweyî piştî bidî xoverdayîş.”

 

Dewleta tirk û bi desan rêxistinê çeteyan bi tanq, top, teyara û sîlehanê teknolojîkan hêrişê Efrînî kerdî. Vera nê hêrişan de şerwanê Yewîya Pawitişê Şarî (YPG) û Yewîya Pawitişê Cinîyan (YPJ) xoverdayîşêko tarîxî nîşan dayî. Netîceyê hêrişan de şar koçê cayê cîya-cîyan kerd û kampan de ameyî bi cakerdiş. Deshezaran efrinijî kampê Xoverdayîşî yê qezaya Fafîn û Ehresî de paweyê roja agêrayîşî yî. Prosesê mexdurbîyayîşî de tena Komeleya hetkarîye Heyva Sor a Kurdistanî piştî daya mexduran.

 

Komeleya hetkarîye Heyva Sor a Kurdistanî heta nika xeylê reyan bi hetkarîyanê cîya-cîyayan hetkarîye daya bi mîlyonan kesan. Xebatkara Heyva Sor a Kurdistanî Mejdolîn Sînoye vengê hîsgerîye daye heme komeleyê heqê merdiman ke bêvengîya xo bixeripnî.

 

Mejdolîn Sînoye vendayîşê xo de wina va: “Hêriş û dagîrkerîya artêşa tirk û çeteyanê ci ver bi sehezaran merdimî mecbûr mendbî koç bikerî û nika nê merdimî binê şert û şurtanê xeylê giranan de cuyenî. Ganî ma nê merdiman xo vîra nêkerî û tena nêverdî. Xeylê lazimîyê şarî yê ke Kampa Şehbaye de bi ca bîyî estî. Kêmîbîyayîşê derman û şertê giranan vera nêweşî vîla bîya. Ganî heme dinya bêvengîya xo bixeripna û piştî bida şarê Efrînî ke Kampa Şehbaye de bi ca bîyî."

 

Mejdolîn Sînoye qiseykerdişê xo yê peyênan de wina va: “Reyna dewleta tirkî hêrişê Vakurê Kurdistanî kerdbî û vakur de xeylê bajaran açarnayî xirabe û şarê ma yê herême her wextî ra hîna zafêr lazimîya înan bi hetkarîye esta. Ganî ma lazimî û hêvîyanê şarê xo bîyarî ca û birînanê înan bipêşî. Îmkanê ma kêmîyî û ma nêeşkenî vernîya nêweşîna bigîrî. Domanî rewşe ra tesîr benî. Eke piştî nêro dayîş do nêweşîyê tewir bi tewir bivirazîyî.”